ANBR-i Prof. Rongsennangba nüng as anger

Dimapur, November 20 (TYO) : Serampore University kübok Clark Theological College nung tesayur Rev.Dr.Rongsennangba nem Professor jenjang agütsüba osang angashia kanga pelar aser pa nem tenüngsang agütsür ta Akhoya Nunger Bendanglir Reju (ANBR) teloki metetdaktsüogo.

Serampore Univeristy kübok tesayurtem rongnung ‘Professorship’ naroküm angutsüba ya temela masü, ajisüaka pai züluba ‘Research paper’ anaprongla junga agizüktetba agi pa nem CTC Board-i November 11, 2015 anogo nung ‘professorship’ agütsüogo ta parnokisa metetdaktsü.

Iba ama pei mapa dak alang naroküm anguba jagi tali ajemalua Tsüngrem tenzükba mapa nung bendanga agütsüshir inyakba ajanga ano lanurtem tajungba anitettsü imlar ta ANBR-isa metetdaktsü.

Tsüngremi maneni Prof.Rongsennangba taküm aser mapa laishirtem asoshi moajang ta parnokisa sarasadema metetdaktsü.