ANCSU 17 buba Biennial General Conference alitsü

Kohima, October 14 (TYO): October 21 nungi 24, 2015 tashi All Nagaland College Students’ Union (ANCSU) 17 buba Biennial General Conference alitsü.
State yimtiba, Kohima nung anogo pezünü mungdang nung kaketshir 1500 shi adenshia shilem agitsü imlar.
Bodbar nikongtsütsü ANCSU office nung osangbener senden ka alidang, Convener Organising Committee, Kelhouneizo Yhome-i ashiba agi, taküm mungdang atema omenji “Excel Beyond Boundary” lir.
“Kaketshirtemi shisaluyimba nung dang masü saka parnok taküm nung wadang balala nung takotet nisungtem akümtsü ajungmesotsü atema onoki iba omen shim” ta Yhome-i ashi.
Nagaland nung aliba college 36 nungi kaketshirtem adenshitsü imlar aser mungdang lapokba sentong nung Nagaland Home Minister ,Y Patton aser shibangba sentong nung Rural Development Minister, C L John na tongti tesemdanger asütsü, ta paisa metetdaktsü.
Taküm mungdang nung shisatokden aser essay züluba tetoktepba agitsü. Item den külemi omen nung ajemdaker academic session ka aser sobaliba shilem ka agitsü, ta ANCSU tir, Tsukjem Longkumer-ia ashi.
Mungdang tasemnübuba nung 2015-17 kümsük atema ANCSU mendenpurtem shimtsü, ta paisa shisem.