ANCSU 17 buba Biennial General Conference temogo

Kohima, October 23 (TYO): Bodbar nungi tenzüka All Nagaland College Students’ Union (ANCSU) 17 buba Biennial General Conference agiyonga arur Hokolbar nikongtsütsü takok ngua tembangogo.
Iba mungdang ya IG Stadium nung “Excel Beyond Boundary” omen nung ajemdaker anogo asemnü agi aser 2015-17 kümsük atema ketdangpur tasen shimer tembangogo.
2015-17 kümsük asoshi President, Zhoku Thüluo aser General Secretary Benjongakum Longchar na lenisüba nung ANCSU ketdangsüa aotsü.
Tena den külemi inyaktsü atema shimba ketdangpurtemji, Vice President – Temjennungsang Jamir, Asst General Secretary – N. Avungo Jami, Finance Secretary – Rhontsuthung R. Jungio, Education Secretary – Viranu Ltu, Publicity & Information Secretary – Imnameren, Social & Culture Secretary – Tsukdirenla Longchar, Games & Sports Secretary – Inato Y. Chisho, Magazine Secretary – Katoka Awomi, Women Coordinators – Tonika Yeptho, Li-ina H. Chopi aser Janshoni Patton nungertem lir.
Ano, Auditor General atema Kitovi Achumi, Union Assembly Speaker atema Johny Ngullie, U/A Dy Speaker atema Mughato V. Yepthomi aser U/A Secretary atema Obed Zhimo nungertem shim.
Iba sentong nung tongti tesemdangerji Rural Development & REPA Minister, CL John liasü aser pai kaketshirtem dang yimya tajung nung libalirutsü aser tejakleni aotsü ayongzük.
Paisa kaketshirtem dang Khristan tesayuba mamatsü aser lokti nung senso tajung kaka asütsü merangang, ta ayongzük.
Sentong nung tetushi süa jaoker Advisor & Senior Principal Secretary to Chief Minister, Lalthara-ia o jembidang, takok angutsü atema ‘anibelem melira tajangzük mali’ ta asüba tangatetba alitsüla, ta kaketshirtem dang ashi.
“Tanü lanurtemji tarutsü lennirtem lir anungji nenok lokti nung temelenshi bener arurtem ka ka asütsüla. Lanurtemi mapa inyaktsü yimya sübatsüla aser talisa construction sector nung tetsüng ajemoktsüla. Ibaji asü nungdang Naga nunger lokti nung ozüng alema arurtem khuret azüoktsü” ta Lalthara-isa ashi.
Taonung mungdang tembangba sentong nung mendenji organizing committee züngsem Medo Chirhah liasü, Dr. Vetso Koza-i temoatsü meshia sarasadem aser Sentienla o Menuolhousie Tsükrü nati ken aten. Sentong nungsa tir menden toktsür Tsukjem Longkumer aser tir tasen shimba Zhoku Thüluo nati o jembi aser organizing committee züngsem Ejanthung Ngullie-i anküp tepela o jembi.