ANCSU 17 buba Biennial General Conference tenzükogo

Kohima, October 21 (TYO) : Bodbar nikongdang Indira Gandhi Stadium, Kohima nung All Nagaland College Students’ Union (ANCSU) 17 buba Biennial General Conference tenzükogo.
Iba mungdang lapokba sentong nung tongti tesemdangerji Higher Education Director, Chubatola Longkumer liasü.
ANCSU kübok college 57 nungi sentepa aliba kaketshirtem dang Chubatola-i, “lennirtem ama aser ano tarutsü sensotem atema tanü kaketshirtemi lokti nung mapa tila ka inyakba ajanga temelenshi bener arutsü merangang” ta ayongzük.
“Kaketshirtemi shisaluyimba nung tematiba jenjang atongtsü merangtsüla aser iba jagi shisatsü anguba dang masü saka pei taküm liyonga aotsü nunga teyari angutsü. Naga nunger lokti nung lanu putui yimsüsürtem, ketdangsertem aser sorkar dak dang teimla meyui terenlok asoshi bilemtsüla,” ta laisa ashi.
Naga nunger lanurtemi tangar jilu ajizüka benshiba dang masü saka asen tetsü-teboutemi mapa inyakba aser tanga sobaliba tajungtem amshiba ajizüka pei taküm nung amshitsüla, ta Chubatola-isa ayongzük.
Kaketshirtem asoshi scholarships menua magütsüba atema HE Director-i ashiba agi, “kodamasüba timtem kar ajuruba ajanga mapang shitak nung scholarships magutsütet saka tekaratiba nung agütsütsü.”
Mungdang lapokba sentong nung mendenji Organising Committee züngsem Kuzoto Lohe liasü aser Meriema Baptist Church sannüker Keduolhoulie Shüya-i temoatsü meshia sarasadem.
Brihostibar anepdang 10:00 ako nungi inaugural session nung tongti tesemdangerji Home Minister Y Patton aser tetushi süa jaokerji Higher & Technical Education Parliamentary Secretary, Deo Nukhu alitsü. Nikongtsütsü 1:30 ako nungi Academic session tenzüktsü aser iba nung seminar & essay writing tetoktepba agitsü. Aonung 6:00 ako nungi theme session nung taoba Nagaland Chief Secretary Alemtemshi Jamir-i tongti tesemdanger ama shilem agitsü.