ANCSU 37buba Foundation Day mungogo

Kohima, August 02 (TYO): Tanü Zonal Council Hall, Kohima nung All Nagaland College Students’ Union (ANCSU) 37buba Foundation Day mungogo; iba sentong nung tongti tesemdangerji, Chief Secretary, Pankaj Kumar liasü.
Iba sentong nung jembidang Kumar-i, Inner Line Permit (ILP) administration policy tashi itshitsü atema state sorkari reprangshidar, ta metetdaktsü.
Ajisüaka Chief secretary-i, bendangertem state-i arur, kechiyong parnoki aayangba taa dalangba agüja aayangtsü maongka angur. Anungji, bendanger nem mapa maongka magütsütsü atema lisopurtemi item mapa inyaktsüla, ta ashi.
Paisa, Naga lanurtemi state sorkari sangdonga aliba “Year of Construction Workers” maongka agitsüla, ta ashi.
Sorkar inyakyim nung oshimashi dak sentakba nung Kumar-i, State Cabinet-i Lokayukta Bill agizükogo, ajisüaka Assembly nung agizüktsü anüngdaka lir, ta ashi.
P&AR Department-i nokdangaka adhoc aser contract appointment kanga bulua aliba dak sentakba nung pai, sorkari iba tetuyuba atema akhanga inyaktsü, ta ashi.
Paisa, item ama inyakyim putetra nüburtemi sorkar nem metetdaktsütsüla, ta mepishi.
Shisaliok tsütsü pai, kaketshirtem tetoktepba den tayongzükba balala atema renema alitsü atema sorkari shisaliok tajung agütsütsü atema kanga nendaka inyakdar, ta ashi.
Iba dak sentakba nung pai, “NAAC-i accredit asüba college aika amenoktsü atema onoki inyakdar,” ta ashiba den külemi Dimapur nung St. Joseph’s Catholic University amenokba ama nija rejutemi shisaliok jenjang tajungba kümdaktsütsü imlar, ta paisa ashi.
Taoba ANCSU Tir, Theja Therie-ia, ANCSU ya kaketshir temeja tentet ka lir,  aser iba tenteti inyakba onüktemji sorkar anema masü saka kaketshirtem tebilemtsü aser nüngdak atema sorkari inyaktsü asoshi benoker dang lir, ta ashi.
ANCSU lenir tain, Theja-isa, ozüng alema aruba Bangladesh nungerji bendangertem ama züngshitsüla aser ILP Act masü saka Foreigners Act ozüngtem benoktsüla, ta ashi.
Kasa sentong nung Naga Students’ Federation Tir, Subenthung Kithan aser ANCSU Tribunal Kezhazer Angami nati jembi aser Zhoku Thuluo-i Tir o jembia liasü.
Model Christian College Kohima nungi Vizünü Noswe aser Capital College of Higher Education Kohima nungeria temeja ken aten.
Iba sentong ya taoba ANCSU  auditor general, Kesosul Christopher Ltu leniba kübok agi aser ANCSU general secretary, Benjongliba Longchar-i tepela anküp o jembia liasü.