ANCSU-i Chief Minister dang KSCJ onük atema mapa inyaktsü mepir

Dimapur, Mongputeni (October) 24 (TYO): All Nagaland College Students’ Union (ANCSU)-i Nagaland Chief Minister dang Kohima Science College Jotsoma (KSCJ) ali atsünga agiba tebimlemtsü süoki ia bilema mapa inyaktsü aser iba ken o angatetteptsü atema mepishia metetdaktsü.
ANCSU-i August 10, 2018 nü iba onük atema nü dangi memorandum ka zülu aser iba atema August 15, 2018 nü indang office-i hopta trok tsüngda KSCJ indang survey report ka sangoktsütsü ta telangzüba agütsü, ta ANCSU President Katho P Awomi aser Kohima Science College Students’ Union General Secretary Vibeizotuo Tetso nati shidi nung shia lir.
Mapang latetba tsüngda district administration-i survey report ka renemer state sorkar nem agütsüogo ta ANCSU-i osang angazükogo. Ajisüaka, survey report agütsür ita ka süiaka state sorkari, talisa Chief Minister’s Office (CMO) nungi tetuyuba magütsüba ajanga district administration-i mapa kecha meinyakteter, ta kaketshir lennirtemisa ashi.
State sorkari kaketshirtem indang khuret angatettsüla aser iba onük tekaratiba nung angatetteptsü atema district administration nem tetuyuba agütsütsü mepishir ta ANCSU-isa chief minister dang metetdaktsü.