ANCSU-i CM dang onük 4 akhanger

Kohima, December 12 (TYO): State sorkari kaketshirtem atema mebilemtsür ta tanü All Nagaland College Students’ Union (ANCSU)-i metetdaktsü.
Iba onük atema ANCSU-i Chief Minister T R Zeliang nem tezüluba ka agütsü aser idakji onük pezü takhangba agütsüogo, ta ANCSU tir Katho P Awomi aser tatong tir Benjong Longkumer nati tanü osangbener dang ashi.
2016-17 atema Nagaland nung aliba ST kaketshirtem nem Post Matric Scholarship (PMS) magütsür saka iba atema sorkari zübazüba dang toktsür. Union Ministry of Tribal Affairs-i 2016-17 atema PMS tanabuba aser tatembangba installment magütsüba ajanga kaketshirtem timtemer, anungji state sorkari lenmang kar bushitepa tanüngba PMS agütsüdaktsünrü, ta ANCSU-i züluba shidi nung shia lir.
Sorkar department balalai Nagaland nung central scholarship scheme tem ketdangsüa repranger aser ibaji ajanga tangutsüpurtem timtem ajurur. Anungji, scholarship scheme tem ketdangsüa inyaktsü atema cell mesüra nodal department balaka tentettsüla, ta ANCSU-isa metetdaktsü.
Higher Education indang Advisor-i kaketshirtem yaritsü aser ajungkettsü atema mebilemer aser iba atema mepelar, ta parnokisa ashi.
October 26, 2017 nü Personnel and Administrative Reforms (PAR) Department office memorandum nung Nagaland Public Service Commission nungi Class-III Non Gazetted mapa ajak agienba aser item mapaji Departmental Recruitment Board ajanga shimtsü tashi agütsübaji magizüker, ta ANCSU-isa chief minister dang ashi.
ANCSU-isa August 11, 2016 PAR office memorandum nung sorkar mapa inyakertem contract basis nung küm asem tema inyakertem regularize sütsütsü ta lemtetba magizüker, ta metetdaktsü.
Tang Nagaland sorkar nung MLA temi August 11, 2016 nü PAR office memorandum magizüktsü aser kaketshirtem yaritsü atema telemtetba agitsüla, ta ANCSU-isa mepishia metetdaktsü.
December 14 aser 15 anogotem Winter Session matongdang Chief Minister nungi telangzüba tajung angutsü imlar. Ajisüaka, telangzüba kechia mengura, ANCSU-i temeten mangu tashi kechi junger ta bilemdir inyaktsü, ta mendenpurtemisa shisem.