ANCSU-i CM Rio dang scholarship agütsütsü akhanger

Dimapur, Metsüremi (March) 13 (TYO): Tanü tashi Ministry of Tribal Affairs-i Nagaland nung ST kaketshirtem nem 2016-17 indang Centrally Sponsored Scheme Post Matric Scholarship (PMS) ano magütsü lir. Iba khuret ya ANCSU-i taoba state sorkar den lemsatep saka parnoki mapa kecha meinyaki anenogo, anungji tang sorkar taseni iba onük atema mapa inyaktsü mepishir, ta ANCSU-i Chief Minister Neiphiu Rio dang shidi ka ajanga metetdaktsü.
Ministry of Tribal Affairs-i 4th installment magütsübaji sen crore 7,71,73,310 lir aser iba ajanga tangutsüpur kaketshirtem kanga timtem ajuruogo. Iba ajanga private aser Government reju 69 nungi ST student 11335 tashi takoksa ajuruogo aser scholarship mapang shitak nung magütsüba ajanga kaketshirtem ajak terata ka nung lir, ta ANCSU Vice- President & Chairman Grievances Committee, Benjong Longchar aser General Secretary Vimeyiekho Vitso nati shidi nung shia lir.
Kaketshir 11335 nem 2016-17 küm indang scholarship agütsütsü atema nai tiyongtsü nung mapa inyaktsü ajungshir. Iba mapa ya meinyaktetba ajanga tarutsü nung maginütsüsa langka kar danga atalokra iba tebilemtsüji ANCSU-i mabentsü ta parnokisa ashi.