ANCSU-i India Tir dang NU nung Vice Chancellor shimtsü mepir

Dimapur, October 18 (TYO) : Nagaland University nung Vice-Chancellor maliba atema All Nagaland College Students’ Union (ANCSU)-i India Tir dangi shidi ka nung khuret metetdaktsü.
Nagaland state nung aliba kaketshirtem asoshi ANCSU-i mapa inyaka arur aser onoki kaketshirtem tarutsü dak sendakba inyakyimtem kanga junga mita repranger, ta ANCSU President, Zhoku Thuluo aser general Secretary, Benjong Longchar nati züluba shidi nung shia lir.
September 7, 2016 nü Prof. B.K. Konwar-i Nagaland University Vice-Chancellor mapa toktsüba sülen nungi tang tashi iba menden tazüng lir. Vice-Chancellor ka maliba ajanga Nagaland University kübok aliba kaketshirtem tetsükdaktsü aika ajurutsü aser maongkatem magitettsü, ta ANCSU-isa ashi.
Vice-Chancellor meshimba atema kuli aika shiakasa, iba menden ta mapang talangka tazüng mayutsüla. Tekolak medeni temangi kecha meinyaktetba ama, Central University ka Vice-Chancellor melii mapa inyaktsü makok. Anungji, tekaratiba nung Nagaland University atema Vice-Chancellor ka shimtsü asoshi mepishir, ta ANCSU mendenpurtemisa ashi.