ANCSU-i JNU nung atalokba aitsür

Dimapur, January 13 (TYO): Akhil Bharatiya Vidyarthi Parishad (ABVP) züngsemtemi Jawaharlal Nehru University (JNU) nung tesayurtem aser kaketshirtem dak teka sangshiba atema aoksar, ta All Nagaland College Students’ Union (ANCSU)-i tanü metetdaktsü.
ABVP-i JNU campus telung nung mapa tamajung inyakba atema sasa bilemer aser temulung raksar. Talisa, parnoki Tai maketba kaketshirtem aser tesayurtem yirutsüba khukhua aitsür, ta ANCSU General Secretary Imnameren N. Jamir aser Education Secretary Keneitsituo Kense nati sangdong ka nung ashi.
Iba inyakyim ajanga JNU nung dang masü saka India kübok aliba rejutem nung kaketshirtem aser tesayurtem amokmerenogo. ABVP züngsemtemi külen kaketshirtem aser tesayurtem dak teka sangshiba aitsür aser iba mapa inyakertem ozüng tapet agi merenshitsüla, ta ANCSU-isa metetdaktsü.