ANCSU-i lecturer mapa tasen adoktsü aser menden timba akümtsü mepir

Kohima, June 24 (TYO): Sorkar college tem nung kaketshirtem teimba züngtettsü atema state sorkari lecturer mapa tali adokdakjang ta All Nagaland College Students’ Union (ANCSU)-i tanü ayongzük.
ANCSU tir inyaktsü atema tasen shimba Temjennungsang Jamir-i anir ketdangpurtemi osangbener den sensaksemdang iba tayongzükba agütsü.
Nagaland nung aliba sorkar college tem nung tesayur aser kaketshir menden peria mali. State sorkari assistant aser associate professor mapa talila adokdaktsütsüla aser sorkar college tem nung kaketshir talila anioktsüla, iba jagi kaketshirtem state toktsür tangalen oa mazüngtsü, ta ANCSU ketdangpurtemi ashi.
ANCSU general secretary Benjong Longchar-ia ashiba agi, parnoki June 20 nü Nagaland University (NU) Vice Chancellor nem tezüluba ka agütsü aser iba nung state nung Central University ka dang aliba renloktsü atema onüktem keta lir.
“Kaketshirtem indang tarutsü aser tia atema onoki kanga kümküma mita repranger aser kaketshirtem nem tetsükdaktsü magütsütsüla” ta ANCSU-i NU VC dangi züluba shidi nung shia lir.
Nagaland nung higher professional degree course azüngtsü atema reju ishika dang aliba atema department ajak nung master’s degree atema menden timba akümtsüla, ta parnokisa VC den tebilemba lemsatep.
Nagaland University-i mapang shitak nung degree results sangdongba atema ANCSU-i pelaba metetdaktsü aser parnokisa University ketdangsertem dang kulikakettem tekaratiba nung agütsütsü atema mepishia metetdaktsü.
Nagaland University nung infrastructure shitak mali aser iba atema Vice Chancellor-i road connectivity, transportation facilities aser tanga nüngdaktem atema inyaktsü mepishir, ta ANCSU-isa ashi.
Parnokisa NU ketdangsertem dang UGC guidelines nung aliba ama college tem nung Assistant Professors aser Associate Professors shimtsü atema mepishi.
Nija aser sorkar college tem nung UGC telatetbatem kübok Assistant Professors aser Associate Professors shimtsüla aser nija college temi Assistant Professors o Associate Professors nem itasen agütsütsü mita reprangtsüla, ta ANCSU-isa metetdaktsü.

Temjennungsang Jamir-i ANCSU tir melenzük
ANCSU tir Zhoku Thulo-i May 30, 2017 nü pa menden toktsüba sülen tatong tir Temjennungsang Jamir tir menden nung ajungket.
Iba telemtetbaji yashi ANCSU indang 5 buba Union Assembly nung agia liasü. Iba dak sendakba nung ANCSU-i affiliated colleges 38 dang tir tasenba den tongteprateptsü atema metetdaktsü.
18 buba Biennial Conference nung ANCSU elections magi tashi Temjennungsang-i Tir menden bena atatsü ta parnokisa shisem.
ANCSU indang Biennial Conference ji November 1 nungi 4, 2017 tashi Fazl Ali College, Mokokchung nung agitsü sentong lir.