ANCSU-i lungkak aitba shilem tasembuba thinener

Kohima, Nov. 30 (TYO): State sorkari scholarship magütsüba anema All Nagaland College Students Union (ANCSU)-i takhangba agüja lungkak shilem tasembenbubaren aittsü ayonga liasü, ajisüaka parnoki iba sentong thinenogo.
State sorkari kaketshir 3615 atema Post Matric Scholarship magütsüba anema ANCSU-i shilem telemsa yur November 20 nungi lungkak aittsü tenzük.
Lungkak aitba shilem tasembubaji asüng, Mongolbar nungi agitsü sentong liasü.
Ajisüaka tanü Kohima nung ANCSU Tir, Zhoku Thuluo, tatong Tir, Temjennungsang Jamir aser tongti tezülur, Bendangakum Longchar nungeri, state sorkari ANCSU takhangba ajak- Merit, Research aser Post Matric Scholarships ataloktsüogo, ta metetdaktsü.
“Transaction dak sentakba tongtepratep shidi ajak tejangja tanü ANCSU office nem agütsüogo, aser kaketshirtem account nung itemji lemtsütsü atema inyakogo,” ta parnoki ashi.
Iba yongji ANCSU-i lungkak aittsü ayongba shilem tasembuba thinener, ta parnokisa ashi.
ANCSU-i kaketshirtem tenüng nung state sorkar dang tarutsü nungbo mapang shitak nung scholarship agütsütsü asoshi mera agidaktsüner, ta mepishia metetdaktsüogo.
ANCSU-i, tarutsü nung yamai menutsüba aser kaketshirtem aser nüburtemi ajuruba timtem hau ta melii toktsüba magizüktettsü, ta shiogo.
ANSCU-isa lungkak aitba shilem mezüngbuba aser tanabuba na nung Union den yaritepa shilem agirtem dang pelaba lemsatepba den külemi scholarship agütsütsü atema meranga inyakba atema Higher Education Dept. danga pelaba olen ka shisem.