ANCSU-i mapa tajung inyaker

Nagaland nung Higher & Technical Education Department nung ochimashi inyakyim agientsü aser metokmeperibatem metongshitsü nükjidong nung All Nagaland College Students Union (ANCSU)-i sorkar nem takhangba agüja lungkak aitba sentong agitsü tenzük aser sorkar nungi telangzüba ka anguba sülen parnoki lungkak aitba sentong thinena atatsü telemtetba agi. Iba sülen mapang tatsüka arudang sorkari iba onük atema telemtetba agiba kar metetdaktsü saka iba nung technical courses atema menden mekazüka yutsüba inyakyim agüja alibaji magizüker ta ANCSU-i metetdaktsüogo. Sorkari iba atema kechi ashir ta ataa lir aser parnoki telemtetba agiba nung ajemdaker ANCSU-i taruba mera agitsü akok. Taoba mapangtem nung ANCSU mendenpurtemi, Naga nunger kaketshirtem tarutsü atema parnoki bilemja mapa inyaker aser takhangba agütsüba nungi masetshitsü ta akangakanga metetdaktsüogo. Technical Education Department ajanga technical course balala atema exam agiba aser menden alemba inyakyim nung metokmeperi aser tim mesüi inyakba ajiteta October 2014 nungi ANCSU-i itemji metongshitsü atema takhangba agüja mapa inyaktsü tenzük. Taküm February 17 nü ANCSU-i sorkar dang, November 5, 2015 nü State Vigilance Commission report agütsüba nung aibelena aliba ketdangsertem anogo 15 tsüngda ozüng tapet agi merenshiang ta sorkar nem takhangba agütsü saka sorkari ibaji meinyak. ANCSU-isa Higher Education Department den Technical Education Department lokteptsü aser state reserved quota atema Nagaland nungi lisopur kintemi dang Technical aser allied course tem atema tenüng agütsütsüla ta takhangba agüja lir. Atangji ANCSU-i mapa tajung inyaker aser Naga nunger kaketshirtem atema süoki ia bilema department nung inyakyim metongshitsü atema takhangba agütsür. Asüng-ser yanü sorkar nungi kechi telangzüba ka angutsüar memetet, saka Naga nunger lanur tarutsü atema bilemja sorkaria telemtetba tajung ka agitsü südi ta imla atar. Küm aika tejaklen nungi Nagaland nung shisaluyimba dak sendakba department balala nung ochimashi aser tim mesüi inyakba tatalokbatem aiben asenoki ajangshia aruogo, saka repranga dang alinung, sorkari mesüra bangdak teloktemi tansütsüsa mapa kecha meinyaki dang yuja ken o tem mokonga kümdaktsü. Tesüiba mapang ketdangsertemi aibelena inyakdangto ozüng tapet agi parnok merenshi mesüra mapa nungi anenja aru asübo, tanü ANCSU-i ola adokba ya melila. Saka Nagaland nung tejak repranga aser akhüm agütsütepa inyaksangshitepba ajanga tanü ochimashiba aser tim masüba inyakyimtem ajanga Naga nunger kaketshirtem tia raksatsüsa tensa ka asenoki ajuruogo.  ANCSU-i tang inyakba mapaji Naga nunger ajaki pusema nungittsüla aser tanü asenoki kaketshirtem tia yanglutsütsüla, kechiyong tarutsü asen lennirtemji parnok lir. Ajisüaka ano, ANCSU-ia telok balala nungi shisatsü agia kanga dang atsüanem kah sorkar nem takhangba agütsütsüla. Tang bangdak nung inyakba ketdangsertemji ozüng tapet agi merenshitsülasa ta ANCSU-i tekong meranga noktak nungbo, shibai metet sorkari ibaji inyaktsüsa akümtsü saka idakji ken o metembangtsü. Kodakirnüaka sür nisung kari ano taoba mapang ataloka aliba onüktem kaktettsü aser itemji ajanga tebenja tali adokdaktsütsü. Kodang tesüiba onüktem kaktetdir tanü ANCSU-i ola adokbaji onükji kinük nung ayutsüsa akümtsü aser lia lia tesüiba onüktem ajanga ANCSU onükji amadoktsü. Kechi metokmeperitemsa inyakogo itemji aseni tanaben lepa bener marutettsü, anungji itemji tantsütsü südaktsür, kaketshirtem tarutsü atema dang bilema ANCSU-i inyakyim nung temelenshi bener arutsü dak dang rangloker aser tom nung mopung maitdaktsüi tasü itta ola adoktsüla.