ANCSU-i PMS atema senden ka amen

Dimapur, Metsüremi (March) 26 (TYO): All Nagaland College Students Union (ANCSU)-i Metsüremi (March) 25, 2018 nü Dimapur nung aliba unit tem den senden ka amen.
Sendenji Eastern Christian College Dimapur nung ayonga amen aser college 15 tashi aden.
2016-2017 küm atema Pre-Matric Scholarship (PMS) dak sendakba nung iba senden amen kechiyong PMS atema timtem tuluba ajuruba district ji Dimapur lir. Dimapur nung aliba college aser secondary school 69 nungi kaketshir 11335 shi iba khuret ajanga kongshir.
Metsüremi (March) 24, 2018 nü Finance department-i sangdong ka agütsüba nung sen crore 7 ser lakh 71 lemzüktsüogo ta metetdaktsü aser iba jagi ANCSU-i PMS onük atema mapa anena atatsü lemtet. Talisa semester examination agitsü mapang tonga aruba agi ANCSU-i colleges/rejutem tiptema mapa inyaka odaktsünüba agi iba mapa anena atatsü lemtet, ta ANCSU sangdong ka nung metetdaktsü.
Kaketshirtem nem temeten magütsü tashi ANCSU-i tenük yoka reprangtsü. Chief Minister-i iba khuret angateta tangalen nungi sen agütsütsü inyakba atema tenüngsang agütsü aser tesüiba mapang nunga iba amai inyaker alitsüba asü, ta ANCSU-isa ashi.
Higher education department aser bank temi Rongchii (April) 5 nungi semester exam/pre university matongdang scholarship agütsütsü atema mepishir. Yamaji meinyakra ANCSU-i kechi junger ta bilemdir inyaktsü, ta sangdong nungsa shia lir.