ANCSU-i sorkar anema lungkak aitba shilem tanabuba tenzükogo

Kohima, November 23 (TYO): Kaketshir 3615 nem Post Matric Scholarship magütsüba atema All Nagaland College Students’ Union (ANCSU)-i lungkak aita arudang tanü nungi tanabuba shilem agitsü tenzükogo.
Tang Smart City indang mapatong atema mapa inyakba mapang ka nung ANCSU-i poster campaign ajanga lungkak aittsü tenzükba nung ‘tamasa smart education, iba sülen smart city’ ta tezüluba nung metetdaktsü.
November 20 nungi Nagaland nung college student ajaki badge tanak kaloker lungkak aittsü tenzük aser ibaji maneni agidar.
Centre sorkari February ita nung parnok lemzükba noklang nung shilem 90 agütsü saka state sorkari tanüngba shilem 10 magütsüba ajanga scholarship mangur, ta ANCSU-i ashir.
“Scholarship ya civil deposit atema masü kaketshirtem atema lir. Scholarship ya yimsüsür aser sorkar ketdangsertem atema masü” ta ANCSU office kima nung tezüluba ka nung shia lir.
Aiben tezüluba nung agütsüba, mapang atakzüktsüba aser lungkak aittsü sentong mezüngbuba shilem tenzüktsü osang sangdongba sülen ang Hokolbarnü sorkari December ita tanabuba hopta tashi nung scholarship agütsütsü ta nangzükogo, ta ANCSU general secretary Benjongakum Longchar-i osangbener dang ashi.
Ajisüaka, kaketshir tentet ka ama, onoki sorkari tenüng agi atemzükba magizüker. Kaketshirtem atema scholarship kechiba parnoki sota ayur, ta paisa shisem.
“Kechiba küm shia onok scholarship atema onok meshimetsür ama kümdaktsür” ta poster campaign tezüluba ajanga kaketshirtemi sorkar dang asüngdanger.