ANCSU-i sorkar dang College Principal tem shimtsü akhanger

Dimapur, September 8 (TYO): All Nagaland College Students’ Union (ANCSU)-i Nagaland Chief Minister dang Government College aika nung Principal maliba indang khuret lemsatepogo aser parnoki tekaratiba nung principal tem shimtsü atema takhangba agütsü.
“Nagaland state nung kaketshirtem asoshi temeten aser liromedemtsü atema ANCSU-i mapa inyaker aser kaketshirtem tarutsü tia dak sendakba onüktem atema onoki tenük yoka mapa inyaktsü meranger,” ta ANCSU President, Zhoku Thuluo aser General Secretary, Benjong Longchar nati sangdong ka nung metetdaktsü.
Zunheboto Government College, Pfutsero Government College, Wangkhao College Mon, Peren Government College, Yingli College Longleng aser SCTE Kohima nung sorkari Principal tem meshimba osang angashia onok temulung raksar. Talisa, item college kar nungbo ita aika Principal maliba osang angazükogo, ta ANCSU sangdong nungsa shia lir.
Temang nung tekolak mali nung kecha meinyaktetba ama, shisaliok reju ka nunga Principal maliba ajanga mapa sadoka meinyakteter. Anungji, state sorkari Principal maliba college tem nung tekaratiba nung nübotem shima mapa nungloktsütsü atema mepishir aser kaketshirtem tenüng nung onoki sorkar dang mepishiba agizüka telangzüba tajung angutsü imlar, ta ANCSU mendenpurtemisa metetdaktsü.