ANCSU-i sorkar nem takhangba balala agütsü

Dimapur, Monupii/May 21 (TYO): All Nagaland College Students’ Union (ANCSU)-i temepeshiba shiti ka yokba dak ajemdaker directorate of Higher Education-i, department ketdangsertem den May 19 nü senden ka amentsü jaokogo.

Union-i Department matsüngda onük kar ajang ajanga benokogo.

1. State sorkar kübok Planning Department aser Finance Department dang Post Matric Scholarship 2019-2020 atema inyakyimtem takaratiba nung inyaksangshitsü shiogo. Iba dak sendakba nung anogo ishika tsüngda sen agizüktsü imlar, ta Union nem metetdaktsüogo. ANCSU-i scholarship tangsa tang agütsütsü khanga Finance Commissioner den ajurutepogo. Ministry of Tribal Affairs, Government of India-i PMS ST 2019-2020 atema centre shilem sen 17,30,59,000 (Seventeen Crore Thirty Lakh Fifty Nine Thousand) mezüngbuba installment ama agüjatokogo.
2. “Union-isa department dang, tatidang aser academic calendar dak sendakba nung tetuyubatem takaratiba nung agütsütsü asoshi Nagaland University ajungshitsü shiogo. ANCSU-isa, kechi südir süaka nisung taküm kümzüka ayutsüji tongtibangtiba asütsüla ta shiogo.
3. Union-i, department dang senotsü tsütsü timtem nung aliba kaketshirtem dang college taa atoktsü asoshi lenmang ka bushitsü mepeshia asüngdangogo. Yamaji union-isa, takar tsürapur/guardian tem dang college/institution tem nem senotsü teyari agütsütsü mepeshia asüngdangogo. Maneni faculty staffs (teaching aser non teaching) tem nem itasen mapang shidak nung agütsütsüla ta Union-i ashi.
4. 1st Semester admission indang jembidang union-i department dang college ajak nem taruba academic session atema kaketshirtem anioka züngdaktsütsü asoshi liromedem tetuyuba ka agütsütsü mepeshia asüngdangogo, kechiyong tang tensa majungba ajanga kaketshirtem aika tanga state nung oa mezüngtettsüsa akümtsü. Iba dak sendakba nung department-i ken o süoki ia agitsü tenangzükba agütsüogo.
5. Government college kar nungbo Principals makai inyaksangshia arudar; Union-i taoba mapang college ajak nung Principals yoktsü khangogo. Iba dak sendakba nung May 27 nü Department Promotion Committee senden amenba sülen iba onük ya agizüktsü aser Principals tem yoktsü ta department-i metetdaktsü.
6. College tem nung IT infrastructures amenoktsü renemshiba dak sendakba nung Union-i Department dang college ajak nung online facilities atema renemshi tenzüktsüla ta shiogo, kechiyong tang tashidak pokteta aliba ajanga tensa mejangjai kümogo. e-book study materials agütsütsü asoshi College Management System/College Dashboard amenoktsü, assignments agütsütsüba, kaketshirtem ita shia attendance/internal marks (kaketshirtem private account) sayutsüba, special online class agitsüba amala onük kar benokogo. Item onük tem ya tarutsü nung tang ataloker aliba amala tensa atalokba mapa teyari agütsütsü aser state higher education renloka aotsü asoshi benoka liasü.
7. Union-i Department dang state kübok tesem kar nung kaketshir kar dang state mokdanga aliba mapang hostel toktsür aotsü asoshi shiogo, ta metetdaktsü. Anungji union-i item hostel tem anem jenjang tapet agitsü department dang mepeshia asüngdangogo. Iba onük nung telangzüba agüja department-i, iba amala ken o ataloka lira hostel permits agintsü aser jenjang tapet agitsü ta ashi. ANCSU-i ki/Hostel kiburtem dang department tetuyuba sülen tashi angaa anidaktsü mepeshia asüngdangogo.
8. Union-i department dang state nung coaching institutes tem asadanga alitsü aser state nung coaching institute amenoktsü asoshi tapet tetuyuba agütsütsü shiogo.
9. Maneni union-i cyber cafe’s/groups/individuals temi scholarship application fee liromedema agitsü asoshi iba dak sendaka aliba ketdangsertem den inyakteptsü mepeshi. Iba ken o reprangshimtsü nangzükba den department-isa kaketshirtem pei college computer lab nungi scholarship apply südaktsütsü asoshi ajungshitsü, ta ashi.
10. ANCSU-isa, hostel tem quarantine center kümdaktsütsü asoshi mekazükba tebilemtsü kaa lemsatepogo. District administration-i, department, college/institute authority aser village council den tongteprateptsüla, ta ashi.

Kasa mapang nung Higher and Technical Education Department/Colleges/Institutes-i college ajak nung COVID-19 committees tentettsüba, hand sanitizers, face mask yangludaktsüba, college ajak nung self help groups tentetdaktsüba aser quarantine centers asütsü asoshi Hostel tem agütsüba atema union-i tenüngsang agütsü.

ANCSU-i, tia tensa ajak nung kaketshirtem ajungkettsü asoshi bendanga agüja inyaktsü, ta ANCSU tir Vimeyiekho Vitso aser General Secretary Imnameren N Jamir nati sangdong ka ajanga metetdaktsü.