ANCSU-i state sorkar eligibility criteria magizüker

Kohima, March 29 (TYO) : Sorkari technical courses atema menden mekazüka yutsüba inyakyim magizüker ta All Nagaland College Students’ Union (ANCSU)-i Mongulbarnü sangdong ka nung metetdaktsü.

Tawa NSF conference hall nung ANCSU rongdak presidential council senden ka amendang March 18, 2016 nü sorkari sangdong ka agütsüba magizüktsü telemtetba agi, ta ANCSU tir Zhoku Thuluo aser tongti tezülur Benjong Longchar nati sangdong nung shia lir.

ANCSU-i February 17, 2016 nü takhangba agütsüba nungi masetshitsü telemtetba agiogo. Technical, Medical aser tanga allied course atema candidate tem indang maitsü tejangja metetba sülen ang menden lemzüktsütsüla, saka bangdak department-i aiben taitsü aketba nisungtem shimogo. Anungji sorkar sangdong nung eligibility category (III) agüja alibaji magizüker, ta ANCSU mendenpurtemisa metetdaktsü.

Naga nunger kaketshirtem atema open competition nung medical, engineering aser allied courses amala technical lines nung menden angutsü kanga tasak, ta ANCSU mendenpurtemisa ashi.

Kaketshir ishikati dang sen aika endoka college tem nung seat anguba dak alaka tanüngba kaketshirtembo state reserved quota dak dang teimla yur menden angutsü meranger.

Anungji, mulungtet telok balala nungi iba onük asoshi tebilemba angadangba sülen telemtetba ka magi tashi sorkari eligibility category III agütsübaji magizüker aser iba ajanga mepetmesü kar adokra iba tebilemtsü khuretji state sorkari abentsü, ta ANCSU mendenpurtemisa sangdong nung metetdaktsü.