ANCSU & administration tsüngda obang meputep adok; Kaketshir 4 pur chiok

June 4, 2019 nü Secretriat junction Kohima nung police-i ANCSU lungkak aitertem noktanger aliba noksa nung angur. 

Kohima, June 4 (TYO): Nagaland nung sen crore 1.32 indang technical scholarship tim mesüi amshiba onük atema state sorkari telangzüba agütsüba magizüki All Nagaland College Students’ Union (ANCSU)-i Mongulbarnü Directorate of Technical Education kima nung mapang telatet makai lumia lungkak aittsü tenzük.
Technical Education Director Arjun Singh-i sen tim mesüi amshiba ketdangsertem tenüng yimjak nung memetetdaktsüba atema pa mapa nungi anenang ta ANCSU-i takhangba agütsür.
Ajisüaka, Technical Education Minister Temjen Imna Along-i “iba onük ya Lokayukta-i bushisüngdang südar aser iba jagi Department-i kecha meshitettsü aser tim mesüi amshiba senji ngutetogo” ta metetdaktsü.
Iba osangji magizüki ANCSU ketdangpurtemi tanep 10:00 ako nungi Department kima nung lungkak aittsü tenzük.
ANCSU ketdangpurtem Secretariat nung Gate No-2 tonga aodang sorkari lungkak aitba sentong magidaktsütsü atema state police force aser Indian Reserve Battalion personnel mapa lemzükja liasü. Ajisüaka, Civil Secretariat lenjem nung college balala nungi kaketshirtem adenshiba ajanga police-i parnok senshidaktsütsü atema tzü khaloktsü aser ANCSU ketdangpur asem den college kaketshir ka apu.
Iba tatalokba sülen kaketshirtem tanaben adenshi aser parnok lennirtem chioktsü atema takhangba agütsü. Idangji ANCSU lennir tejentem, Naga Students’ Federation (NSF) aser Angami Youth Organisation (AYO) arua tensa süngjemdaktsü aser police-i apuba ANCSU ketdangpurtem chiok.
ANCSU president Katho P. Awomi-i ashiba agi, ANCSU-i lumia lungkak aitba sentong manentettsü kechiyong iba ya kaketshirtem atema inyakba mapa ka lir.
Minister Along-i department nung ochimashi ketdangsertem kümzüktsü meranger, kechiyong ochimashi ketdangsertem dang nungi sen meyipa anguba jagi meperir saka parnok dak ozüng agi merenshitsüla, ta Awomi-isa ashi.
Onoki tensa raksatsü atema lungkak aiterba masü saka Directorate of Technical Education kima nung ola madoki timi dang lungkak aiter. Onok ya-tzüraba agi asütsü akok saka onoki iba sentong manentsü.
Onoki district administration dang nungi temelaba meshi saka parnoki magütsü, ta paisa shisem.
Iba sülen police-i ANCSU president Awomi tanaben atema apu aser lungkak aitba kaketshirtem senshidaktsütsü atema tzü khaloktsü.
Ajisüaka, AYO ketdangsertem den lennir kari tiyongtsüi ia police nem Awomi pur moudaktsü.
ANCSU lennir tejentem den külemi noktaker osangbener den jembidang Awomi-i “onoki lungkak aitba nung shilem agitsü atema kaketshir shinga maja, saka tang teinyakdak ketdangpurtemi Technical Education office kima nung mener lungkak aittsü osang dang sangdong. Ajisüaka, kaketshirtem parnok sasa molungteter sentong agidaki aru” ta metetdaktsü.
Kohima District Administration nung ketdangser kati ashiba agi ANCSU-i jelia temelaba memeshiba agi magütsü.
ANCSU ketdangpurtem Secretariat kima nung adenshiba sülen ang administration dang nungi temelaba meshi. Ajisüaka, tensa mejungi akümtsü akok ta ajitetba agi temelaba magütsü, ta ketdangseri ashi.