ANCSU ketdangpur tasentemi mapa melenzükogo

Kohima, November 20 (TYO): 2019-2021 kümsük atema All Nagaland College Students’ Union (ANCSU) ketdangpur tasentem shimogo.
Bodbarnü ANCSU president Vimeyiekho Vitso aser general secretary Imnameren N Jamir nati anir ketdangpur tasentemi mapa melenzük.
Zunhheboto nung ANCSU 19 buba lokti mungdang alidang ketdangpur tasentem shima liasü.
NSF Conference Hall nung ANCSU lennir tejentem lia ketdangpur tasentem mapa melenzükba sentong agi.
“ANCSU nung ketdangpur tasentemi kaketshirtem jenjang ajungkettsü atema inyaktsü imlar. Nenoki college azüngertem asoshi bendanga agüja inyaktsüla aser tasü itta noktaktsüla” ta NSF president Kesosul Christopher Ltu-i tajungshi o jembidang ashi.
“Nenoki ketdangpurtem ama masü saka volunteer tem ama inyaktsüla. Nenok ANCSU indang alizüng aser temeten atema inyaktsü mepishir” ta Ltu-isa shisem.
Tir tasen Vimeyiekho Vitso-i o jembidang “ketdangpur tasentemi kaketshirtem ajungtsü atema inyaktsü. Onoki mapa inyaka aodang lennir tejentem teyari nüngdaktsü” ta ashi.
Külen, taoba tir Katho P Awomi-i social media nung olulu kar prokshiba atema osang jangjashitsü.
ANCSU ketdangpur tasentem ya timi dang shim. Election agiba maparen atema ashishitep onük kar benok saka ANCSU-i itemji jungjunga reprangdanger jangjatsüogo, ta Awomi-i ashi.
Iba sentong nung Kohima Ao Baptist Arogo Pastor Tiatoshi Longkumer-i ketdangpur tasentem meshiteta sarasademtsü. Sentong nung mendenji taoba tatong tir Benjong Longchar liasü aser Pithungo Shitio-i temoatsü meshia sarasadem. Tatem nung taoba women coordinator Meyitula-i anküp tepela o jembi.
ANCSU ketdangpurtem: president Vimeyiekho Vitso, general secretary Imnameren N Jamir, vice president Inato Y Chisho, assistant general secretary Inagha Kinny, finance secretary Edward Nring, social & cultural secretary Imtinaro Imsong, education secretary Keneitsituo Kense, information & publicity secretary Aochuba P Jamir, magazine secretary Kahovi Rochill, games & sports secretary Tenyesinlo Bukh aser women coordinator Lika A Zhimo nungertem lir.
Union assembly nung speaker Toito D Chishi, deputy speaker S Topeka Yeptho aser assembly secretary Viketouno Nikhi nungertem lir. ANCSU indang auditor general ji H Kivika Achumi lir.