Andhra CM’er jabaso Lokesh den tangar 10 minister tenangzükba agi

Amaravati, April 02 (Agencies): Deobarnü Andhra Pradesh Chief Minister, N. Chandrababu Naidu-i minister pongu anentsüba sülen par jabaso, Nara Lokesh den tangar 10 Cabinet nung aniokogo.
Tanü state Angh, E.S.L. Narasimhan-i ketdangsüa parnok nem tenangzükba agidaktsü.
Ano opposition YSR Congress party nungi Telugu Desam Party (TDP) nung adener par asema Cabinet nung aniokogo.
Naidu’er ajaso chir, Lokesh taküm March ita nung state legislative council nung shima liasü. Arishi küm 34, Lokesh ya TDP nung General Secretary lir.
Tenangzükba agiba sülen Lokesh-i tebu aser Angh na tetsüng nung kongshia tena dang temoatsü meshia liasü.
Iba sentong nung Lokesh tetsü, Bhuvaneswari, kinüngtsü Brahmini, kinüngtsü tebu aser par kinünger actor, N. Balakrishna nungera aden.
Taoba ita TDP MLA, Bhuma Nagi Reddy temelungjang tashitak agi asü, aser tanü par jala, Akhil Priya-i minister atema tenangzükba agiogo. Tanü ya la tasoba anogomung lir.
Arishi küm 26 tain, Priya tetsü, Shobha Nagi Reddy 2014 küm gari lendong nung asüba sülen lai Allagadda assembly by election nung takok ngua liasü.
2014 küm June 9 nü Naidu Chief Minister atema tenangzükba agiba sülen tang mezüng par Cabinet ulushiogo.
Iba kümji TDP teloktep BJP MLA ana densema minister 19 tenangzükba agia liasü.