Andhra-i ‘Anti-Mosquito’ Act benoker

Hyderabad, November 06 (Agencies): Taruba küm ana tashi nungbo Andhra Pradesh nung merla meshimeshia malitsü nükjidong nung state sorkari ozüng ka yanglutsü lemtetogo, aser iba ama ozüng yangluba mezüngububa state ji Andhra Pradesh asütsü.
State health department-i Mosquito Breeding Control Act draft süogo, aser iba ozüng kübok yimtak aser jila nung merla poktetdaktsüba atema temerenshi alitsü.
Tan ita Cabinet-i draft Bill ji agizükba sülen taruba assembly senden nung iba ya ozüng akumtsü, ta tongti ketdangser kati metetdaktsü.
Taküm September 20 nü state Chief Minister, N Chandrababu Naidu-i merla anema “Domala Pai dandayatra” sentong sangdonga liasü aser September 28 nü pai, state ya merla meshimeshia maliba state ka kümdaktsütsü ta nangzüka liasü.
Paisa, “Onok nükjidong ya malaria, dengue, chikungunya, diarrhoea, typhoid, swineflu ama menatepba tashitak 9 state nungi samatsütsü atema lir. Iba ya takoktsü mapa ka lir. Tawa onoki merla anema rara ayongzükogo. Iba atema onoki anogoshia inyaktsüla aser küm ana nungbo Andhra Pradesh ya mosquito free state akumtsü,” ta sangdonga liasü.
Iba mapa atema nüburtemi pei aliba temeket merüka ayutsü atema tesayuba agütsütsü, aser Self-Help Groups (SHGs) aser Village sanitation committees-ia shilem tulu agitsü.
SHGs-i merla poktetba tesemtem noksa tangoktsü aser noksaji state headquarters nung aliba command control centre dangi yokba sülen iba atemaji inyaktsü.
Item teintyaktsü atema SHGs nungi tetsür züngsem 9,000 training agidar, aser iba den kasa yimtitem nunga inyaktsü.