Andhra Pradesh nung nisung 27 ajemset

Rajahmundry, July 14 (Agencies): Mongolbar nü Andhra Pradesh, Rajahmundry nung ‘Pushkaram’ benjungmong tenzüknü Godavari ayong nung tzü chikutepba mapang tetsür 13 densema tajemba agi tekülemer 27 tashi ajemsetogo aser tangar 20 yiruogo.

Asürtem ajakji Andhra tzüyimkümlen alirtem dang lir.

East Godavari district kübok Rajahmundry jila nung aliba Kotagummam Pushkar ghat nung tekülemertemji kishi asem jagi tama asütsü raktepa aoba mapang iba lendongji atalok.

Ketdangsertemi ashiba agi, anepongi ayong nungji metenoka tzü chikuba ajanga tia tajung bener arutsür ta tamang aliba yong tamangertemi ghat ji tama atongtsü raktepa asemtep.

Ghat (ayongi aiba lenmang) nungji tamanger aika adenshitsü ta imlaa matabaji ketdangsertem tamakok ka lir, iba den külemi tamangertem asoshi jilia sentong meyangluba ajanga iba lendong atalok.

Tzü nung metener adoker tamangertem aser tzü nung metentsü asoshi arur tamangertemji kishi nungji mejeptep, saka ketdangsertemi kishiji melapoktsü, ta iba lendong nungi jenbur tekülemer kati ashi.

Küm 12 shia khen ajuruba benjung nung adentsü asoshi state tesem balala nungi tamanger jenti adenshiba mapang iba lendong atalokogo.

Tanep 7:30 ako nungi 8:00 ako tsüngda atalokba lendong nung asürtemji timbaka kanga taintem liasü.

Rajahmundry Sub-Collector Vijaya Ramaraju-i ashiba agi, tasümangtemji Rajahmundry Government Hospital-i bener ogo aser yirua alirtemji anasa aliba hospital kati anir ao.

“Tang tashi nung asürtemji 27 lir. Parnok timba ka tetsür taintem lir,” ta pai ashi.

Kishiji melapoktsüba ajanga iba lendong atalok, ta tekülemer aikati tai tongloktsüogo.

Godavari ‘Pushkaram’ ya küm 12 nung khen dang ajurur aser taküm balaka kanga tia taka küm lir, kechiyong iba ya küm 144 shia ‘Maha Pushkaralu’ khen   ajurushir ta parnoki amanger.

Anogo 12 benjung Pushkaralu ya tanü Telangana aser Andhra Pradesh state naprongla nung tenzükogo.