Andhra Pradesh nung train lendong ataloka nisung 39 asü

Vizianagaram, January 22, 2017: Honibar ayaterm nung Andhra Pradesh, Vizianagaram district kübok Kuneru Railway station anasa Jagadalpur-Bhubaneswar Express train tetsüng longteta tsükoker aliba noksa nung angur. 

New Delhi, January 22 (Agencies): Honibar aonung 11:00 ako meta Andhra Pradesh, Vizianagaram district kübok Kuneru station anasa Jagdalpur-Bhubaneswar Hirakhand Express train coach tuku train lenmang nungi tetsüng longteta adoka lendong ataloka tajemba agi nisung 39 asü aser 60 den tema yiruogo.
Tasürtem 39 nungi tasümang 16 bo tang tashi maitsü mejangjateta lir aser yirua alirtem rongnung nisung tenetbo kanga mejungi lir.
Deobarnü Union Railway Minister, Suresh Prabhu-i lendong atalokba tesemji semdangba sülen iba tatalokba kuli bushisüngdangtsü atema tetuyuba agütsüogo.
“Iba tatalokba bushisüngdangtsü aser aibelenertem nem temerenshi agütsütsü,” ta Union minister-isa metetdaktsü.
Prabhu-isa, Centre aser state sorkar napronglai teyari agütsütsü atema inyaktsü, ta shisem.
Railway ketdangsertemi ashiba agi, asürtem tali akumtsüa akok, kechiyong train meküpa aliba telung nungi ano tasümang karbo ngutettsü südi, ta ashi.
Prabhu-isa asürtem kibongtem ajuru aser parnok dang takoksa anguba atema senotsü teyari agütsütsü nangzük.
“Tanü asürtem kibongtem den ni mangyim jashi lemsateper. Ni Railway ketdangsertem dang tekaraba nung senotsü teyari agüjang ta tuyuogo,” ta pai ashi.
Railways Ministry-i asür kibong shia nem sen lakh 2, kanga mejungi yirur shia nem sen 50,000 aser tera yirua alir shia nem sen 25,000 agütsütsü, ta sangdongogo.
Andhra Pradesh Chief minister, N Chandrababu Naidu-ia Chandranna Bima kübok sen lakh 5 agütsütsü, ta metetdaktsü.
Mezüng bushisüngdangba ajanga, train lenmang raksaa aliba ajanga iba lendong atalok südi ta bushitet. Ajisüaka ibaji train lenmang raksaba ajanga asü ketdangsertemi lenmangji anepalu mesüi züzüa doktsüba ajanga’ar mejangja.
Odisha Police-i, iba ya Maoist telungpurtem mapa masü, ta shiogo.
“Commissioner Railway Safety-i bushisüngdangba sülen ang kuli tejangja metettsü,” ta Railway otongdar, Anil Saxena-i metetdaktsü.