Andhra Pradesh nung vote agütsüra Special Status agütsütsü: Rahul

New Delhi, Metsüremi 06 (Agencies): State sorkari meshiba ama Andhra Pradesh nem Centre nung BJP-i aniba sorkari special status magütsüba atema Congress tir Rahul Gandhi Sangtennü aitsü.
Jantar Mantar nung Telugu Desam Party aser YSR Congress MP temi Andhra Pradesh nem special package khanga longkak aitba anogo nung Gandhi-i iba o ya ashi.
Twitter nung Gandhi-i longkak aitba indang video ka densema post sütsüba nung, Andhra Pradesh nüburtem nem obendang agütsütsü asoshi opposition telok ajak longjema lir, ta ashi.
Iba video post mesütsüdang Gandhi ya Jantar Mantar nung longkak aitertem den oa aden aser iba mapang 2019 nung Congress teloki sorkar kümtetra Andhra Pradesh nem special status agütsütsü mulunga lir, ta ashi.
“Onoki Andhra Pradesh nem special status jenjang agütsütsü. 2019 küm yimden kümtetba sülen onoki iba mapa ya mezüng inyaktsü,” ta pai ashi.
“Asenok külemi longjemer nokdaktetra Government of India aser Ato Kilonser Narendra Modi dang Andhra Pradesh nüburtem nem tagütsütsü tim agüjang ta shitettsü,” ta pai shisem.
Iba ken o ya Parliament nunga liasü, kong Rajya Sabha aser Lok Sabha nung opposition teloki sorkar ya Punjab National Bank nung ochimashi mapa inyakba aser Cauvery tzü nung mangatettep aliba benoka aitsü.
TDP ya shidakbabo Centre nung BJP-i aniba National Democratic Alliance sorkar nung shilem ka lir. Saka Telangana den sadangba sülen nangzükba ama special status magütsüba ajanga iba party nung tekolakba aser Andhra Pradesh Chief Minister N Chandrababu Naidu aser par telok mepelai tesendaktem mejungi aküm.