Andhra Pradesh onük nung Parliament nung longkak ait

New Delhi, Tsüklai 08 (Agencies): Yangtepnü Parliament nung Telugu Desam Party (TDP) aser YSR Congress züngsemtemi Andhra Pradesh state nem maongka balaka agutsütsü aser senotsü tajangzük balala agütsütsü atema takhangba agüja longkak aita liasü.
Lok Sabha nung party ana nungi züngsemtemi longkak ait, aser ibaji ajanga Question Hour mapang senden thinen aser Rajya Sabha nunga kasa onük nung longkak ait.
Lok Sabha nung TDP aser YSR Congress-i Speaker sabangleni oa Andhra Pradesh nem ochi temeten agüjang ta yimyim ayima longkak ait, aser iba mapang nung Speaker, Sumitra Mahajan-i parnok dang pei mendeni meyipa aotsü mepishi.
Question Hour mapang nung TDP MP, N. Sivaprasad-i Lok Sabha Secretary General indang table nungi kaket kar agizük aser ibaji bener aotsü merang.
Iba dak sendakba nung Speaker-i, “Parnokji (secretariat staff) nenok atema inyaktsürtem lir, parnok dak langka atalokra… Iba ya tim masü, parnok dang nungi pila ang,” ta ashi.
Ajisüaka parnoki Secretary General table nungi mainshiba ajanga Speaker-i senden minute 15 thinen. Iba sülena longkak ait, aser iba mapang nung Parliamentary Affairs Minister, Ananth Kumar-i züngsemtem dang Finance Minister, Arun Jaitley o jembitsü arudangbo longkak aitba anentsü mepishi.
Ano Rajya Sabha nunga senden 12:00 ako tashi thinenba sülen tanaben adenshidang, TDP züngsemtemi maneni Andhra Pradesh Reorganisation Act onük benoka liasü.
Iba onük bentettsü atema chairman-i mapang agutsüdang Chowdary-i, “Sorkari dang melungra special status category nung onük kar lir. Sorkari anogo 15 tsüngda item onük atema inyaktsütettsü asü. Budget onük nung telangzüba agutsüdang Finance Minister-i iba indanga jembitsüla,” ta ashi.
“Sorkar tenüng nung ni iba ya ashir, Andhra Pradesh Re-organization Act meshisadangi agizükbaji züngsem ajaki meteta lir, aser ibaji party anaprongla tai ajanga lir,” ta paisa ashi.
Iba sülen maneni longkak aitba ajanga chairman-i nikongdang 2:00 ako tashi senden thinena liasü.
TDP züngsemtem ya NDA den loktepa lir, ajisüaka sorkari nangzükba ama meinyakba atema parnoki sorkar aitsür.