Andhra Pradesh & Tamil Nadu nung ‘Vardah’ yipru süitsü

New Delhi, December 11 (Agencies) : Hombarnü Tamil Nadu aser south Andhra Pradesh tsüngda ‘Vardah’ yipru süitsü aliba atema state ajungalen kümdanga alitsü osang sangdongogo aser National Disaster Response Force (NDRF) teloktem tesem balala nung mapa lemzükja lir.
Bay of Bengal tzükümlen dena Andhra Pradesh aser Tamil Nadu nung kümdanga alitsü osang metetdaktsüogo, ta ketdangser kati ashi.
Andhra Pradesh kübok Nellore, Tada, Salurupeta, Oongle aser Chitpore district nung nung NDRF telok ka ka mapa lemzükja lir. NDRF telok ka nung züngsem 40 shi lir. Maneni, Salurupeta-ia telok ka yokogo aser Guntur aser Hyderabad nunga NDRF teloktem lir.
Chennai nung aliba Regional Meteorological Centre ajanga ashiba agi, Deobar nikongtsütsü 2:30 ako meta tashi ka nung Chennai nungi kilometer 330 shi pilar liasü aser Hombar anüngdang Tamil Nadu aser south Andhra Pradesh tsüngda aliba tzüküm atongtsü.
Iba yipru ajanga Deobar aonung nungi tzünglu arutsü aser Hombarnü Chennai, Tiruvallur aser Kancheepuram tesemtem nung tzünglu tesashiba arutsü, ta Area Cyclone Warning Centre, Director, S Balachandran-i ashi.
December 12 nü item district nung tzünglu kanga arutsü aser mopung tashi jia 80-90 kph tashi aontsü asadangtetogo, ta paisa ashi.
Chief minister, O Panneerselvam-i Tamil Nadu State Disaster Management Authority senden ka ayonga amen aser paisa armed forces dang yariteptsü renema atatsü osang sangoktsüogo.