Andhra train lendong nung MLA ka densema nisung 5 tsükset

Anantapur, August 24 (Agencies): Hombar anepdang züngia Andhra Pradesh, Anantapur district kübok Penugonda anasa train level crossing nung lung amena bener aliba truck kati Nanded Express train dak tsükoktsüba lendong nung Devedurg constituency (Raichur district) MLA densema nisung pongu tashi süogo.

Truck aser train tsüktepba mapang nungji truck nung bena aliba granite lung tulu kati Karnataka nungi MLA, AV Venkatesh Nayak mena aliba train takdang nungji tsükoktsü. Iba lendong nung truck anisangjia süogo. Tanüngba asürtemji Indofil Industries nung General Manager Raju, AC coach technician Syed Ahmed aser Raichur nungi Pulla Rao nunger liasü.

Truck jagi level crossing süngküm shibanger alibaji tsükboker oa train nungji tsükokja H1 air-conditioned coach nung mena alir par pezü tsükset.

Tanep züngia 2:30 ako meta atalokba lendong nungji nisung ana kanga mejungi yiruba sülen anasa aliba Penugonda Area Hospital-i anir ao.

Anantapur district collector Kona Shashdhar-i ashiba agi, truck anisangji yi agi meseper liasü südi, mesüra gari brake nung timtemba ajanga iba lendong atalok südi.

Iba lendong atalokba ajanga Bangalore-Guntakal railway lenmang shibanga liasü aser Anantapur, Kaloor, Thadicherala aser Garladenni railway station tem nung train kar anendaktsü. Tesülen item trainji Katpadi, Jolarpet, Pakala aser Dharmavaram junction lenmangtem ajanga yok.