Andrzej Duda-i Poland Tir inyaktsü tenangzükba agiogo

Warsaw, August 07 (Agencies): Conservative yimtenren telok nungi Tir inyaktsü temeten angusang, Andrzej Duda-i Poland Tir inyaktsü tenangzükba yashi Brehostibar nü agiogo.

“Poland nung yimtenren temelenshi bener arutsütsü aser meshimejungertem indang taküm tia tajungba küma temalen ajungkettsütsü nangzüker,” ta Tir inyaktsü tenangzükba agiba sülen arishi küm 43 tain Duda-i yashi sangoktsü.

“Asen linük tentetba Europe tesem nung North Atlantic Treaty Organization (NATO) mitkartem tang aliba den timba nungdaka kümogo,” ta shia, Russia’er tashiyim sentongtem nungi par Poland linük kümzüka ayutsü asoshi khuret benokba olen ka pai metetdaktsü.

“Asen linük kümzüka ayutsü nükjidong nung sangküm, 2016 küm Warsaw nung amentsü ayongba NATO summit senden nung NATO nungi nungdakba teyari meshitsü nangzüker,” ta pai ashi.

Yaküm Britain kübok Wales nung amenba NATO senden nung Eastern Europe nung tentetba linüktem nem nungdakba mitkar teyari agütsütsü asoshi Rapid Reaction Force (RRF) ta ajaba mitkar telok ka tentettsü renem saka iba mitkar telok kijai par Europe ajunga kümzüka meyutettsü ta temulung malemba olen ka Duda-i metetdaktsüogo.

Ano, Poland-i renemba sentong aser alizüng balala takok ngudaktsütsü nükjidong nung pai European Union (EU) sendentem nunga takok ngua nungdakba onüktem benoktsü renemba osang ka Duda-i yashi metetdaktsü.

“Poland linüki tejakleni mera agia terenlok angutsü asoshi nübur aser lenirtem ajungai amalitepa nungdakba maparen külemi lungjemer inyaktsü ajungshir,” ta pai ashi.

National Assembly nung züngsemba yimsüsür aser Parliament senator-temi repranga alidang taoba Poland Tir, Bronislaw Komororwski melenzüka taküm May ita agiba Tir election sentong nung takok angusang, Duda-i yashi Tir tasenba akümtsü tenangzükbaji agia liasü.