Andy Murray-i BBC Sports Personality Award agizükogo

London, December 21 (Agencies): Britain nunger tennis asayar mongin, Andy Murray-i BBC 2015 Sports Personality of the Year sempet yashi Deobar nü Northern Ireland kübok Belfast yimti nung agizükogo.
Tesüiba mapang, 1936 küm akokba sülen tan mezüngsüa par Britain nem Davis Cup takok marok taoba November ita bener arutsüsang, Murray-i iba nungtugu sempet ya tan agi tanabenbuba agizüker lir.
“Ni iba sempet agizüktsü meimlai liasü. Ajisüaka, kü nem iba sempet agütsüba atema kanga pelar,” ta tebur tennis asayar tarensen nung World No. 2 jenjang abensang, Murray-i sempet agizükdang metetdaktsü.
“Küm 5 tsüngda nung asen Britain linük indang tennis jenjang tekübokba tia nungi temaba jenjang tongogo aser iba alizüng ya asangsang nung ajangzüktsü tabo ni kodanga mebilem,” ta Olympic gold aser 2012 US Open takok marok agizüksang, Murray-i ashi.
Murray sülen anidaka, taoba rugby league asayar, Kevin Sinfield-i Sports Personality of the Year tanabuba jenjang angu.
Sinfield-i rugby asayatsüren toktsüba jakdang Challenge Cup, League Leaders’ Shield aser Super League takok marok ajangzüka liasü.
2015 World Heptathlon champion, Jessica Ennis-Hill-i tasembuba jenjang anguba osanga jangjaogo.
Ano külen, 2010 Sports Personality sempet agizüksang, Jump jockey mongin, AP McCoy-ia yashi sentong nung Lifetime Achievement Award agizüka liasü.
Arishi küm 33 tain Dan Carter aser Northern Ireland manager, Michael O’Neill na nema BBC 2015 Overseas Sports Personality aser 2015 Coach of the Year Award agütsüba osang jangjaogo.