Andy Murray-i Paris Masters akok; World No. 1 aküm

Paris, November 07 (Agencies): Britain nunger Andy Murray-i final asaya nung takok ngua, Paris Master tennis asayamong takok marok yashi, Deobar nü agizükogo.
Taoba mapang grand slam takok marok 3 ben tashi agizüksang, Murray-i yashi points 6-3 6-7(4) 6-4 agi America nunger John Isner final asaya nung tsükdaktsü.
Tan takok anguba ya Murray-i tan mezüngsüa Paris Masters takok marok agizüker lir.
Ano, tan takokba ya pai taküm, 2016 küm tenzüker tanü tashi nung asayamong 8 buba nung takok marok aser pai tennis asayatsü tenzüker tanü tashi nung Masters asayamong takok marok 14 buba agizüker lir.
Tan takok anguba sülen Murray-i küm tembanga ayonga asayaba ATP World Tour finals nung temaba jenjang nung asayatsü temetena nguogo.
Teshimtetba tebur tennis asayartem asoshi ayongba ATP World Tour finals-ji Britain yimtiba, London kübok O2 Arena nung tan November ita 13-20 nü tashi asayatsü renema lir.
Double Olympic champion, Murray-i tanü tashi nung ajak agi takok marok 43 tashi agizüker asayar kümogo.
Ano külen, Serbia nunger Novak Djokovic-i taoba hopta tamakok anguba sülen Murray-i tebur ATP World Rankings nung tan mezüngsüa, World No. 1 akümba osang ka tanü, Hombar nü metetdaktsüogo.
Murray-i ajak agi points 11,185 ajangzüka, points 10,780 ajangzüksang, Djokovic ajangteta, World No. 1 akümtsü temeten angu.
Tena sülen anidaka, Switzerland nunger Stan Wawrinka-i points 5,115 ajangzüka, 3 buba jenjang; Canada nunger Milos Raonic-i points 5,050 ngua, 4 buba jenjang aser Japan nunger Kei Nishikori-i points 4,705 ajangzüka, 5 buba jenjang nguogo.
Ano külen, tetsür WTA singles asayar tarensen nung Czech Republic tsür, Petra Kvitova-i maneni World No. 1 jenjang abentsü temeten nguogo.
La sülen anidaka, America tsür, Serena Williams 2 buba aser Poland tsür, Agnieszka Radwanska 3 buba jenjang nung lir.