Anema aliyim asoshi kija aser lokti ajak teka amteper inyaktsüla

Guwahati, September 18 (Agencies): Sensaker aser nüngdaka aliba purtem temang anepaluyim peria ngutettsü asoshi kija aser lokti ajak teka amteper inyaktsüla, ta Hokolbar nü Assam Chief Minister Tarun Gogoi-i ashi.
“Tajemzük tia nung alirtem aser nüngdakba puri atutsüsa temang anepaluyim lenmang sadema lapoktsütsübaji tang rongdak lir. Anungji ibaji atema kija aser lokti ajak teka amteptsü nüngdaker,” ta Confederation of Indian Industry (CII)-i temang anema aliyim asoshi ayongba sentong ka nung jembidang ashi.
Tanü asüng mozü jenjang ka tasak akümbaji item nisungtemi atutsüsa atsüzüktsüla, ta pai ana nü amungba North East Healthcare sentong nung ashi.
Temang anema alitsü aser kaket shisatsü nüngdak ta ashiba mapang, Gogoi-i, merükmejuba ajanga tashidak aika nungi kümzüker, ta shisem.
“Temang merüka ayuba, tzü temerük ajemba aser merük mejuba agi tashidak aika nokdangtetter,” ta paisa ashi.
Anungji yimtsüng nung mozü meteter timba nüngdaker ta ashidang pai, tang state sorkari shiranger anepalutsü asoshi shimteta yutsürtemi mapang tajung inyakdar, ta metetdaktsü.
“State nung aliba yimtsüngtem asoshi tang mozü meteter aser shiranger anepalur nüngdaka lir. Indian Medical Council-i yimtak lir asoshi nüngdakba metettsüla,” ta pai ashi.