Anenja aliba Congress MP tem tanü nungi senden nung adentsü

New Delhi, August 09 (Agencies): Taküm Parliament tzüngluruwa senden tembangtsü anogo pezünü dang anünga lir, saka Modi’er sorkar aser Congress-i anir opposition party tem na tsüngda tekong kanga merangtepba ajanga senden junga makateti tanü tashi arudagi.
Anogo pongu tejaklen Lok Sabha Speaker Sumitra Mahajan-i Congress MP 25 anenja liasü aser Hombar nungi tenzüka parnok senden nung tanaben adentsü, saka maneni senden nung rongrong adoktsüa akok, kechiyong Congress-i ajang-ajanga, parnoki akhangba mataloktsüra senden nung parnoki maneni lungkak aittsü, ta metetdakja lir.
Senior Congress otongdar aser Rajya Sabha züngsem, Abhishek Singhvi-i, “Onok Opposition-i ochimashiba, menden nungi aludaktsütsü akhangba, ozüng aser tang teinyaktak minister temi aibelenba onüktemji atangji tatalokba nung ajemdaker benoker,” ta shiogo.
July 21, 2015 nü senden tenzükba anogo nungi Congress densema opposition party temi Lalit Modi aser Vyapam ochimashi ken o nung densema alir- External Affair Minister, Sushma Swaraj, Rajasthan Chief minister, Vasundhara Raje aser Madhya Pradesh Chief minister, Shivraj Singh Chouhan nunger pei menden nungi aludaktsütsü akhanger, ajisüaka sorkaria parnok pusema tekong meranga noktaker.
Iba dak sentakba nung Parliamentary Affairs Minister M Venkaiah Naidu-i, “Tang Congress-i, nenoki ozü minister (UPA sorkar minister) trok anendaktsüogo, anungji nenoki ner minister anaji anendaktsütsüla ta ashir. Ajisüaka onoki kecha aibelena mali nungji, kodaser onoki aji oda inyaktsü,” ta shiogo.