Anepalu masüba takoksa

Asenok timatemba dang masü saka tangar tsüngdang asenok tejak metentettsüsa Nagaland nung state government-i yangluba lenmang, apu aser kiojen kangasa mejungi aliba jenjang ya anepalu masüba ajanga lir. Atangji, tang tashibo Nagaland sorkar dak nübortemi kecha nunga temulung melemtetter. Iba jagi government-i aliba oset süra ibajibo quality tamajung amai bilemer mesüra government-i inyakba mapa süra mashimashika inyak amato bilemer aser metsütsüi governemt-i aliba oset aser inyakba mapatemji majung asür. Asenoki asen lima ya kanga topur junga shitak yangluner saka government mapa nung nübortemi temulung alemtsüsa meinyak tashi asen limabosa majungtsü. Nagaland nung tang nübortem rongnung timatemba rongnung tanga tesemtem nung lenmang maka timatemba dang masü saka Kohim aser Dimapur nung apu raksar gari taolen maka nungtepa yur timtemtepba tia ya ka asütsü. Item timtem ajurutsüsa talokba ya jungjunga bilemdangra junga meyangluba kija agi masü saka yanglur anepalu masüba ajanga atalokbatem lir. Kohima nung yimsüsürtem mapa inyakdak Civil Secretariat-i aiba lenmang nung apu ponger aoba aser Dimapur nung Nagrajan apu nung tejaja majung kaksaa aoba timtem ajakji apu yanglur anepalu masüba ajanga lir. Atangji, Kohima apuji yutsür Dimapur nung Nagarjan apu yabo kanga tejen, anungji tasen melena yanglutsüa mapang tonger liasü. Ajisüaka, tejena anepalu masür aser tasena meyanglur ta asüba mapang nung arishi agi matateti apu chireptsü tenzüker. Ashi, apu tejen asüyonga, tasen melena meyangludang, government-i mapang mapang shia apu tema aser tekulen ajak reprangshia anepalu asübo, ano kasa apu nungji tanga junga jajateta lila ta bilemer. Tangbo joko raksadoker asünungji, asenok mulungsüngzüktsü ajak agi nisung tejajadak nung Nagarjan apu chirepa asüama aser yiruyipong lendong matalokbaji asütsü. Atangji, government nung alir ketdangser aser mapa reprangertem yamaisa yimbazüa alinungbo, Dimapur nung apu chirepa asüama lendong tulu ataloktsübajia menua mali. Tang Dimapur nung apu tongtibang asem anünga lir, kaji Dhansiri apu aser tanga anaji train lenmang ayaokja atemba apu Burma camp anasa ka aser NST bus station anasa ka ta  lir. Dhansari apu yabo tasen saka anepalu masüba agi joko tema nung moti küma motzü atsünger aser cement ajak yimzüka oadoker yin kateta adokba angur. Iba amaji anepalu mesüi yutsüra apuji kodangang ka tashimait kümer chireptsüar memetetba jenjang ka nung lir. Ano, shisabolutsü tulutibaji train lenmang ayaokja temdangba apu ana rongnung Burma camp anasa aliba apuji asütsü. Iba apu temer mapang talangkabo masü saka apu renema gari jajatsü tenzüker sülen government-i iba apu reprangshia yanglushiba kena mangu. Joko, apu tezü anatsülen railing akangakanga dang masü saka topur junga anepalua ayutsü melen telephone cable wiretem benjatepba dang angur aser railing dena mali kümdagi. Ibaji dang masü saka lendong tulutibaji apu dak chiloka nisungtemi longki süa atuba angur. Ibaji asenok ajak asoshi lendong tulu lir. Tema nungia apu kanga tashimait kümer angur nung telongjibo komaka tashimait kümer asütsü ta kanga shisabolua bilemer. Kasaji asen lima nung gari lenmangtem aika National Highway küma aoba angashir. Ajisüaka, National Highway o State Highway na majungtsü tokteper amato lenmang junga alibabo kata mali kümogo. Ibaji lenmang junga meyangluba kisüng agi masü saka yanglur anepalu masüba ajanga lir. Kechi mapa südir süaka inyaker mesüra yanglur toktsübaji tatem masü saka iba sülen tamajung aser tejen mekümdaktsüi repranga anepalutsübaji lir. Tanübo, asenok ajak tia majung Nagaland nung nübortem asoshibo kiojen tasen yanglutsürtema mali aser tejen yanglushia anepalutsürtema mali ta pei kija agitsü bilema rongsen bushirtem agiang Nagaland sünga kümogo. Iba jagi Nagaland topur raksar aser nübortem lendong tulu ajurutsüsaba tia ana nung lir.