Angami nunger HSLC & HSSLC toppers tushi

Kohima, Monupii (May) 30 (TYO): Tanü Angamimiapfü Mechü Krotho (AMK)-i AMK Ki nung HSLC aser HSSLC toppers nem tetushi agütsüba sentong ka ayonga agi.
Angami nunger toppers 11 nem tenüngsang agüja jembidang AMK tir Kevinourheno Seyie-i “takok ya odangbo mangur saka ano tajungtem rongnung tajungtiba anguba yabo talila inyakba aser tangar dang nung talila merangba ajanga dang angur” ta ashi.
“Tsüraburtem aser taintemi nenok dak tarutsü nükla ayur. Nenok taküm tang ang tenzüker aser lanurtem dang lir aser iba ajanga Tsüngremi tatishitsü südaktsütsü atema lanurtem ajar ta asüba kuli sayur” ta laisa ashi.
Kevinourheno-isa toppers dang tali merangtsü, nendaka azüngtsü aser ochishia alitsü atema ayongzük.
Angami Public Organisation tir Kepelhousie Terhüja-ia toppers nem tenüngsang agütsü aser talisa tetsür kaketshirtemi tebur dang nung tenüng tajungba bener aruba atema balaka pelaba shisem.
Paisa, tebur kaketshirtem dang tali merangtsü aser tarutsü nung takok tajungba angutsü atema ayongzük.
AMK-i toppers nem tetushi agütsüba aser ajungmesoba atema Kepelhousie-i AMK dang pelaba ashi aser APO-ia lanupututemi takok tulu angutsü atema tetoktepba tangatetba agütsütsü atema iba mesükba sentong ayonga agitsü ta paisa shisem.
HSLC toppers: Vivotsonuo Sorhie (Mezhür Higher Secondary School); Top 8 – Neingusanuo Kire (Northfield), Top 9 – Nongoto Lcho (Coraggio), Top 15 (a) Purino Neikha (Mezhür) & b) Vimeno Nakhro (Mezhür), Top 20 – Noune-ü Z Yashü (Mezhür).
HSSLC toppers: ARTS – Top 3 – Vikedono Seyie (Rüzhükhrie GHSS Kohima), Top 4 (a) Mhasilenuo Mechülho (Mezhür) & (b) Visakhonuo Kulnu (Mezhür) aser Top 5 – Keneituonuo Semou (Mezhür).
HSSLC Science: Top 1 – Virienuo Emilia Solo (Kohima Science College Jotsoma).