Angami Sekrenyi Mini Hornbill 2019 tenzükogo

Kohima, Tsüklai/Feb. 25 (TYO): Angami Public Organisation (APO) aser Nagaland sorkar longjemer “Purifying Confluence” omen nung amendaker ayongba Angami Sekrenyi Mini Hornbill 2019 benjongmung ya February 25, 2019 anogo Khuochiezie nung tenzükogo aser iba benjong ya February 27, 2019 anogo Tuophema yimdak tembangtsü.
Iba benjongmung sentong nung jembiba mapang Ao Senden tir Chubawati Ao-i ashiba agi, Sekrenyi benjongmung nung shilem agitetba ya pa aser külem Aortem asoshi konang aser maongka tulu lir. Pai iba Ao kin ajunga tenüng nung Angami nungertem dang Sekrenyi benjong salem lemsatep.
“Sekrenyi ya merüktetba/asüngtetba benjong ka lir, koba ajanga temang aser tanüla merükteter aser merüktetba ya tetetzü taret aketba yimya ka lir. Akhi asen tetsü tebuo mapang nungi Angami aser Aortem tsüngta tesendaktep tajung lia aru. Kin anaprongi iba tesendaktep meraksai arudagi. Saka asen tembatinu ajanga iba dang temaba jenjang tongtettsüsa yur kechiba yangji tenük sünger alitsü. Sekrenyi benjongmung ochi tanüla agi asen tesendaktep tali akangshia kati ka den tashi aser meranga inyaka yaritepdi,” ta pai ayongzük.
Pai benjongmunger ajak dang kin balala tsüngta mokokmein aliba amadoker Naga nunger nem telongjem bener arua asen li nung shinga senzüka metoktsüi terenlok nung aintsü asoshi inyakdi, ta ayongzüka liasü.