Angami Students’ Union-i aitsür

Dimapur, June 17 (TYO): June 16, 2017 nü mejangjatetba nisungtemi Kiruphema Youth Organization züngsem Vikehiekho Dahou dak teka sangshiba aitsür, ta Angami Students’ Union (ASU)-i sangdong ka nung metetdaktsü.
Mejangjatetba nisungtem jagi parnoki Naga yimten telok ka nungi ta shia Sp. Vikehiekho dak teka sangshiba atema aoksar aser jashir. Telungpur tenüng amer KYO aser ozü nübotem amokmerenba aser teka sangshibaji onoki magizüker aser odang metoktsütsü, ta ASU tir Visako Rino aser tongti tezülur Vizokho Zashumo sangdong nung shia lir.
“Anentsüh alua aliba tesem nung public yarirtem dak iba ama mapa inyakba aitsür. Shirnoki ozü züngsem dak iba mapa inyakogo, nenok sasa nenok maitsü tema nung metetdakjang ta onoki tuyur, aji mesüra onoki nenok bushitsü aser timtem kar danga ajurura, iba tebilemtsüji nenoki abentsü,” ta ASU-isa metetdaktsü.
ASU-isa yirua alir tekaratiba nung tajungba küma ang ta sarasademer aser KYO pusema nungiter, ta mendenpurtemisa ashi.
Angami nunger litsü nung terenlok mapa inyakba nung timtem agütsütsü atema nisung kari kanga meranger aser ozüng alema inyakertem nem telangzüba agütsütsü, ta Angami Students’ Union-isa metetdaktsü.
Talisa, Dimapur aser Kohima tsüngda tang teinyakdak ‘four lane road project’ nung Naga yimten teloktemi tashiyim agi sen meshia timtem agütsür. Tang ama tensa ka nung, Naga yimten teloktemi aremzüktsüla aser ozüng alema mapatem meinyaktsüla, kechiyong iba ajanga Naga nunger renloktsü atema inyakba mapa nung tamakok angutsü, ta ASU sangdong nungsa shia lir.
ASU-i ozüng alema inyaksangshibatem mita reprangtsü aser NCSU aser parnok den yaritepertem ajak pusema nungittsü, ta sangdong nungsa metetdaktsü.