Angami Youth Organization-i NPF aitsür

Dimapur, Rongchii (April) 18 (TYO): Principal Secretary, RD, Lhubeilatuo Kire ya kanga dang tenendak Nagaland state ketdangser ka lir saka NPF-i pa dak tai tongloktsüba angudang kanga aoksar ta Angami Youth Organization (AYO)-i sangdong ka nung metetdaktsü.
NPF-i kuli tejangja kecha melii Lhubeilatuo Kire dak tai tongloktsübaji pa tenüng menüktsütsü atema dang inyakba ama ajiteter. Sorkar mesüra opposition tsüngda mangatettep mesüra kati ka anema jembibaji tim dang, saka NPF-i yamai nisung ka tenüng menüktsütsü atema tebilemba tamajung yur inyakba yabo magizüker, ta AYO-isa ashi.
Onoki NPF dang kuli tejangja agütsütsü mesüra yimjak nung pa dang tatok meshitsü takhangba agütsür. Tarutsü nung mepetmesü majurutsü atema NPF-i tang ken o ka adoka aliba ya tamajungba küma moudaktsütsü imlar, ta AYO Tir Neinguvotuo Krose aser Tongti Tezülur Kekhrie Pfukha nati sangdong nung shia lir.