Anganwadi nung inyakertem nem training agütsü

Mokokchung, Mongputeni/October 2 (TYO): District Level Centre for Women- Mahila Shakti Kendra aser Sakhi one stop Centre, Mokokchung Nagaland-i ayongzüka Ongpangkong North kübok Anganwadi nung inyakertem, ‘Violence against Women and Children’ dak sendakba nung awareness sentong ka ayongzüka kaogo.
Iba sentong nung shisalsen agütsürji Women Welfare Officer (DLCW) , Mokokchung Moamenla Longkumer liasü. Lai tetsür aser tanur tem dak teim mesüi benshiba tapu balala indang rasaa ashiba den iba ajanga mental health dak koda kongshir iba indang lemsatep. “Nagaland ya India nung tetsürtem kümzüka aliba tesem rongnung ka ta züngshiaka tetsürtem dak teim mesüi benshiba aika ataloker, koba tenüngmenük tsübuba ajanga memetetdaktsüi süitemer,” ta lai ashi. Lai, tetsürtem dang tasü aittsü aser tensai bener arutsüba mapang pei temeden asoshi nokdaktsü ajungshi. Laisa, jungdak mapang tetsürtem asoshi service balala agütsüba lemsatep. Service tem rongnung Women helpline 181, Sakhi-One Stop Centre, Legal aid services, counselling services aser helpline number balala densema lir aser item ya tetsürtem ajangzükdaktsütsü asoshi 22×7 lapoka alir, ta ashi.
Iba sentong ya District Coordinator MSK Nukshinaro lenisüba kübok aka aser sentongnung Ongpangkong North, Mokokchung CDPO Talisangla-a dena liasü.