Angati football coaching camp Kohima nung akatsü

Kohima, May 16 (TYO): Dimapur nung mezüngbuba grassroot level free football coaching camp kanga takok ngua akaba sülen, Nagaland Football Coaches Association (NFCA)-i Kohima Local Ground nung May 22 nungi 26 tashi “Make Football Happen” omen nung ajemdaker tanabuba coaching camp akatsü asoshi renemogo.
Iba dak sendakba nung NFCA-i tanur football asayatsü jangrar arishi küm 6 nungi 12 tashi, sports asayadang asemba süoshi, tsüngsem aser tanga tenüngdakbatem den külemi birth certificate bener arua tenüng züluoksemtsü asoshi metetdaktsü.
Tejangrartem-i May 22 nü Kohima Local Ground nung nikongtsütsü 2:45 ako shidak nung arua parnok tenüng züngsemtsü asoshi metetdaktsü.
Maneni May 20 anepdang Kohima Local Ground nung 9:00 ako nungi tenzüka AIFF (All India Football Federation) “D” certificate ngua alirtem aser (Asian Football Confederation) AFC”C” Licence Coach tem atema Refreshers & Orientation sentong ka ayongzüka akatsü. Anungji Nagaland nung aliba AFC aser AIFF coach tem ajak iba sentong nung arua adentsü asoshi metetdaktsü.
Chiajemtsü ajak sentong ayongertemi agütsütsü saka senzüsenpongba aser anenzükba nung idokbatem ajak pei sasa dang asütsü ta metetdaktsü.
Camper ajak nem NFCA certificate agütsütsü. Iba sentong nung tesayubaji NFCA tir Roko Angami aser NFCA technical director William Koso nati agütsütsü.