ANGCTA-i taküm tesayurtem anogo sentong nung shilem magi

Kohima, September 06 (TYO): Takümbo ANGCTA (All Nagaland Government College Teachers’ Association)-i  Tesayurtem anogomong nung shilem magi, iba den külemi iba anogomong nung shilem magiba temaitsü sorkar college nungi tesayurtemi anogo tepiyong ‘badge’ tanak khaloka liasü, ta ANGCTA Tir, Dr. Imliwati Jamir aser tongti tezülur, Dr. Phyobenthung nati sangdong ka ajanga metetdaktsü.

Centre sorkar dang 7th RoP agütsütsü atema akhangba aser linük tesem ajungalen ibaji liromedema benoktsü densema takhangba balala agütsüba sorkari sendoka yutsüba anema takümbo university aser college tesayurtemi tesayurtem anogo nung shilem magitsü atema AIFUCTO (All India Federation of University and College Teachers’ Organisation) aser FEDCUTA (Federation of Central University Teachers’ Association) leniba nung telemtetba agia liasü, ta sangdong nungsa shia lir.

Tesayurtem anogomong nung New Delhi, Jantar Mantar nunga tesayur meyirjang aika adenshir tesayurtemi parnok puang ta ashi.

Nagaland nung class tem nungbo timtem magüjaka ANGCTA ya AIFUCTO den affiliate süa alibayong AIFUCTO aser FEDCUTA-i ayongzükba nung dena tesayurtem anogo nung shilem magi, ta sangdong nungsa shia lir.