Angela-i Macron den senden amentsü

Berlin, May 12 (Agencies): Hombarnü Berlin nung German Chancellor, Angela Merkel-i France Tir, Emmanuel Macron den ajurutepa senden ka amentsü.
Taoba Deobarnü Macron-i Tir election nung takok anguba atema Angela-i tenüngsang agütsü aser pelashishia agizüker ta metetdakja liasü.
“Macron-i French nunger, Germany nunga nisung aika aser Europe ajungalen nisungtem aika indang teimla abener” ta Angela-i ashi.
France nung Tir election mapang Angela aser lar sorkari EU den tokteper Marine Le Pen madak Macron pusema nungit.
Macron-i takok anguba sülen minute ishika tsüngda Angela-i pa den phone ajanga jembi aser pai EU pusema nungiba atema pelaba metetdaktsü.
Angela aser Macron na Hombar anüngdang ajuruteptsü, ta Angela atema otongdar Steffen Seibert-i ashi.
Brihostibarnü Germany Finance Minister, Wolfgang Schaeuble-i, “European Union akangshitsü atema Germany aser France nati mapa inyaktsü aser iba nung Macron den külemi inyaktsü” ta metetdaktsü.
Schaeuble-isa ashiba agi, pa aser Macron nati 19-country eurozone atema parliament ka tentettsü mulunga lir.
“European parliamentarian temi eurozone parliament ka tentettsü akok aser European Stability Mechanism (ESM) tejakleni bener aotsü atema iba telok ket nung tashi alitsü” ta Schaeuble-isa shisem.