Angelina Jolie aser Brad Pitt na küm 12 sülen balaogo

September 21, 2016: Hollywood stars- Angelina Jolie aser Brad Pitt na kibong kümer küm ana sülen balaogo, ta osang angazüker.
TMZ.com osang ajanga ashiba agi, Oscar award angur actress Angelina-i pa den balatsü atema Hombarnü (September 19, 2016) ken o agütsüogo.
Kasa osang ajanga ashiba agi, Jolie-isa obendanger dang tena chir trok- Maddox, Pax, Zahara, Shiloh, Vivienne aser Knox nunger la den alitsü atema shiogo. Laisa obendanger dang Brad Pitt nem tanurtem reprangtsü temeten magütsütsüla saka semdangtsü temeten dang agütsütsüla, ta shiogo.
Ano tanga osang ka ajangabo, Brad Pitt-i tebuti ka shilem agiba nung Angelina-i melung masüba ajanga lai pa den balatsü lemtet.
Maneni New York Post osang ajangabo, Brad Pitt-i pa den film tasen nung külemi shilem agila, Marion Cottilard den medema Angelina ashioktsüba ajanga lai balatsü lemtet, ta ashi.
Arishi küm 41, Jolie-i pa kinüngbu itangita reprangtsü atema nija investigator ka hire süa liasü, aser ibaji ajanga kinüngbui la ashioktsüba lai metet, ta kasa osang ajanga ashi.
Tang Brad Pitt aser Marion Cottilard na ‘Five Seconds of Silence’ film tetangokdak lir.
“Iba film tangokdang pai (Brad) la (Marion) den medemer ta lai (Jolie) melung melemi bilemba agi lai nija itangiter ka hire asü. Atangji lai melung melemi bilembaji shitak liasü,” ta kasa osang ajanga ashi.
Iba osang ya shitak asütsü südi ta bilemer, kechiyong Brad Pitt aser Friends actress, Jennifer Aniston na kibong kümer lia 2004 küm Brad aser Angelina nata ‘Mr and Mrs Smith’ film tangokdang meimtepa liasü.
Brad aser Jolie na küm 10 külemi aliba sülen 2014 August nung kibong aküm.
France tsür actress, Marion Cottilard-i tamalen Inception film nung shilem agia liasü aser 2007 küm lai ‘La Vie en Rose’ film nung Edith Piaf shilem agiba ajanga Oscar award ngua liasü.