Angelina Jolie aser Suu Kyi nati tetsür mapa inyakertem semdang

Hlaing Tha Yar nung mapa inyakertemi Hollywood actress Angelina Jolie aser Myanmar opposition lennir Aung San Suu Kyi na pela agizükba angur.

 Yangon, August 3 (Agencies) : Hollywood actress & United Nations special envoy Angelina Jolie aser Myanmar opposition lennir Aung San Suu Kyi nati Hlaing Tha Yar nati süoshi yangluba factory ka semdang.

Taoba Bodbarnü Jolie-i Myanmar semdangi aru aser lai linük yimtiba Naypyidaw nung Tir Thein Sein den ajurutep aser ano Kachin state nung tashiyim agi tetsür raksatsürtem ajurutepa sensaksemogo.

Jolie-i Nobel sempet angur Suu Kyi den lar Yangon kidang mezüng ajurutep aser iba sülen Hlaing Tha Yar nung Myanmar textile industry tongtiba semdang.

Tenati idakji mapa inyakertem den ajurutepa parnok aliba aser mapa inyakba onüktem indang asüngdanga sensaksem, ta Facebook nung Suu Kyi-i aniba National League for Democracy party ajanga metetdaktsü.

Suu Kyi-i jaokba atema Jolie-i tan mezüng atema Myanmar semdanger ta British Embassy-i metetdaktsüogo. British Embassy-i Preventing Sexual Violence Initiative mapa inyaker aser iba nung Jolie-i shilem agir.

Myanmar nung civil war aika adoka lir aser item timbaka arrtsülen lir. Taküm November ita general elections magidang sorkari linük ajungalen ceasefire alitsü atema mapa inyaker.

2011 nung civil awr adokba sülen Kachin nung nisung 100,000 shi ka pei talidak nungi jena orr tanga nung jenoka lir.

Jolie-i mezüng Cambodia semdangba sülen Myanmar semdangi aru. Cambodia nung lai Netflix atema film ka yanglunür aser ibaji Cambodia Khmer Rouge yimsüsüba dak ajemdaker yanglutsü.