Angelina Jolie dang FBI-i asüngdangya asü

Los Angeles, October 27, 2016 : Actress Angelina Jolie dang Federal Bureau of Investigation (FBI)-i pa kinungbo actor Brad Pitt nija tayimtsü nung mataloktsü ka atalokba otsü gondha pezü tashi asüngdangya asü.
September 14, 2016 nü Pitt-i yi jemer par jabaso arishi küm 15 tain, Maddox-i den o agi raraba dang masü saka teka dena sangshi aser ibaji ataloker anogo ishika tang lir külen Jolie-i pa den balatsü ken o benok ta osang kar ajanga ashi.
Nisung kari iba osang metetdaktsüba sülen FBI-i iba otsü bushisüngdang asür kechiba süra ibaji parnok tesem nung atalok.
“FBI temi tayimtsü apusoba mapang nungi anenba mapang tashi nung atalokba ajak metetnüa liasü aser Angelina Jolie-i parnok den kanga lenji arutepa jembiogo,” ta osang kar ajanga usmagazine.com dang metetdaktsü.
Kasa osang ajanga ashiba agi, FBI-i iba osang ano hopta ishikabosa bushisüngdangtsü aser iba sülen obendanger nem osangtemji agütsütsü. Obendangertemi FBI-i nguteba osangji asadanger merenshitsü langa lira Pitt merenshitsü. Iba maparenji ita ishika tsüngda nungang tembangtettsü.
Aji oda süaka Pitt aser Jolie naprongi obendangdak menokdaknü bilemer.
“Tena prongi iba ken o obendangdak metongdaktsüner kechiba süra FBI aser (Department of Children and Family Services) DCFS-i ngutetba ajak yimjak nung metetdaktsütsü aser ibaji kibong rangben atema majung asütsü,” ta osang ajangasa ashi.
Iba tatalokba nung Maddox meyiru aser tayimtsü nung mena alir tenük kuli angur kari ashiba agi Pitt-i jabaso dak teka sangshibaji kongshinüseta kongshiba masü, ta kasa osang ajanga ashi.
DCFS-i ano tang Pitt danga asüngdangya asütsü ta angazüker.
Iba tatalokba dak sendakba nung kinungtsü o kinungbo na aser tanurtem – Maddox 15, Pax, 12, Zahara, 11, Shiloh, 10, aser jakrep ana, arishi küm 8 tain, Knox aser Vivienne – ajak dang asüngdangya süogo.
Jolie aser Pitt nati tanur ayutsü atema telemtetba ka agi lir. Tang atema tanurtemji Joilie den alitsü aser Pitt-i therapist ka kübok tanurtem semdangtsü lemteta lir.