Angelina o Suu Kyi nati tetsür mapa inyakertem den ajuruteper

Yangon nung tentetba factory balala nung mapa inyakba tetsürtem den ajuruteptsü asoshi Myanmar opposition lenila, Aung San Suu Kyi aser UNHCR special envoy, Angelina Jolie nati Yangon kübok Hlaingtaryar Industrial Zone nung tentetba tetsür hostel ka tanü Honibar nü tonga aoba noksa nung angur. (Yangon, August 01)

Yangon, August 01 (Agencies): Actress aser nübur temeten asoshi nokdaker, Angelina Jolie-i Myanmar opposition lenila, Aung San Suu Kyi den külemi Yangon yimti nung alir tetsür mapa inyakertem den tanü Honibar nü ajurutepogo.
Myanmar nung tetsür mapa inyakertemi timtem toushi jenti ajuruba den külemi, parnok indang taküm jenjang kanga mejungi aliba osang alima ajunga dang sangdongtsü nükjidong nung tenati tanü tetsür mapa inyakertemji ajurua liasü.
United Nations High Commissioner for Refugees (UNHCR) special envoy, Angelina-i tan Bodbar nü nungi tenzüka anogo 4 agia Myanmar semdanger lir.
Tanü Yangon yimti tezülen mapa inyaka aliba tetsürtem den ajurutepba den külemi, Angelina-i parnok alidaka semdangba osang jangjaogo.
Myanmar sorkar aser sorkar anemer na tsüngda yimjung tezüngzüktep 2011 küm agienba sülen tang pei talidak makai akümba Kachin nübur 10,000 dak tema alidak, Kachin State-a Angelina-i tan hopta tetenzüklen semdanga liasü.
Myanmar nung kin tila nung züngsemer taküm jenjang kanga mejungi aliba osang alima dang metetdaktsütsü nükjidong nung Angelina-i Yangon nung alir Rohingya kin züngsemtem dena tanü ajurutepogo.
“Myanmar kübok Rakhine State nung kin o kin na tsüngda kanga sashia raraba ajanga pei talidak toktsütsüsüa akümba Rohingya nüburtem indang taküm jenjang kanga mejungi lir,” ta Angelina-i tanü metetdaktsü.
Tan Bodbar nü Myanmar tonga aoba sülen, Angelina-i Myanmar Tir, Thein Sein dena Naypyidaw yimtiba nung ajurutepba osang jangjaogo.
Myanmar nung alir tetsürtem nem nungdakba mozü mora aser temzüng ozüng den sentakba teyari peria agütsütsü ajungshiba den külemi, parnok taküm tashiyim agi raksatsüba lendong nungi kümzüktsü den sentakba nungdakba terenemshiba tajung agitsü olen ka Angelina-i metetdaktsü.
Taküm November ita agitsü ayongba Myanmar parliamentary election nung nübur talisa, tetsür aser lanurtem ajungai shilem agitsü tayongzükba olen ka Suu Kyi-i jaokba sülen tan Myanmar semdangla, Angelina-i metetdakja liasü.