Angetyongpang A/C taoba JD (U) candidate Sashimar Jamir Congress nung denogo

Mokokchung, March 28 (TYO): Taoba state election nung 24 Angetyongpang Assembly Constituency nungi JD (U) candidate Mongsenyimti nunger Sashimar Jamir, Congress party nung agizükba sentong tajung ka March 28, 2019 nü Mokokchung District Congress Committee (DCC)-i ayongzüka parnok DCC office nung agiogo.
Tanü iba sentong nung Mokokchung DCC President, Watimongba Aier-i anir DCC Vice President Noktsüng, DCC Secretary Aotemsü, Mahila President Chubala, DCC Adviser Satemliba, DYC President Rongsenshilu aser 24 Angetyongpang ACCC tenüng nung Imlinukshi parnoki shilem balala agia tepela o den tayongzükba otem jembi.
Sashimar Jamiri iba sentong nung jembidang, India nung political party aika lir, saka teimbaka communal party dang lir aser tanga party nunga dendanga aruogo, saka Congress party ya dang nübur ajak den sakuku süa litetba party ka lir, anungji, item ajakji asadanger külen Congress nung adentsü mulungtet, ta ashi.
Taoba mapang Nagaland nung Congress-ji kanga wangshia liogo, saka tanübo Nagaland State Assembly nung legislator kada mali azüngmeyaker, anungji, taoba mapang wangshia aliba bilemteta kasaji bener arutsü teimla nung meranga inyaktsü aser aji menua mali, ta paisa ashi.
India ya alima nung democracy tulutiba ka lir, saka NDA sorkar aruba sülen India nung “freedom of expression” mali, ochi osang perokertem ajak parnoki sota ayur aser NDA-i dictatorship amai yimsü asür, ta paisa NDA sorkar aitsü. Parnoki osangtsüsang (media) ajak amoksepa ayur, ta paisa shisem.
NDA sorkar aruba sülen linük nung timtem aser teraksa jenti adokogo aser parnoki nüburtem atema sentong tapu balala sangdonger saka mapabo kecha maka, ta paisa kuli kar bener arua ashi.
“Ni Congress nung adenba ya menden ka agitsü atema adenba masü, saka Congress party züngsem ka kümer tashi angaa aser iba party tashi itdaktsütsü meranga inyaktsü teimla nung adenba lir”, ta paisa shisem.
Iba osangbeneri Sashimar Jamir dang “na kechiba JD (U) toktsür Congress party nung adener?” ta metetnüa asüngdangdang, “Candidate kaji pei mulungba kisüng nung dangbo maor, saka supporter olajia angatsüsa akümer”, ta ashi.
Paisa iba dak sentakba nung metensüa ashidang, India nung political party aika lir saka chichiba secular party-jibo Congress dang lir, “Akhi nungi ni Congress Party-ji kanga nükshia aru aser Congress manifesto-ji kanga tajung aser Naga nunger atema iba ya tapet party ka lir”, ta pai ashi. “Tang ya dang shitakba party nung arua adener”, ta paisa shisem.
Naia Naga yimden tebilemtsü indang ya kechi koma bilemer? ta metetnüa asüngdangdang, “Asenok melungjemra asenok taginübaji mataloktsü, tebilemba ka/arok alizüng (common goal) nungdaker aser iba atemaji asenok longjemtsüla”, ta pai ashi.
Iba osangbenerisa Mokokchung DCC President, Watimongba Aier dang, tang aruya aliba election dak sentakba indang kar asüngdangdang, “Mokokchung district nungbo parliamentary (MP) aser 26 Aonglenden Assembly Constituency bye-election anaprongla nung Congress-i takok angutsü imlar”, ta ashi.
Sashimar ama lanur lenir tajung ka Congress Party nung adenba ajanga party nung temelenshi tulu adoktsü imlar ta Mokokchung DCC President-isa pelaba o ka lemsatep. Nisung kar danga Congress party nung züngsemtsü jangraa lira ajak pela shishia agizüktsü kishi lapoka yutsür, ta paisa shisem.
Tanü iba sentong nung Congress nung züngsem asütsü atema tasen pur aika arua shilem agia denogo. Sentong nung Congress Veteran-temi anir Congress meimer lanurtema aika arua aden.