Angh Acharya-i G. Rio School nung IIMUN lapoktsü

Mongulbarnü Nagaland aser Assam Angh, P. B. Acharya-i G. Rio School, Kohima nung IIMUN senden nung o jembiba angur.

Dimapur, February 17 (TYO) : February 16, 2016 nü G. Rio School Kohima nung anogo asemnü India International Model United Nations (IIMUN) sentong tenzükogo.
UN Security Council nung India teti atema züngsem ka akümtsü onük nung ajemdaker agir iba sentong ayongzüka agir aser Nagaland o Assam Angh, P. B. Acharya-i lapokja liasü.
Tanü putu nung lanurtemi alizüng tulu ayuba aser UN Security Council nung India teti atema züngsem akümtsü atema tebilemtsü bena mapa inyakba angudang kanga pelar, ta Acharya-i tongti tesemdanger o jembidang ashi.
Linük asoshi tashi tulutibaji lanurtem lir anungji lanurtemi maneni tamangba yimsü tsütsü telemsa maliba tangatetba, loktiyimten aser sobaliba wazüka ayutsü ayongzüker, ta paisa ashi.
Nagaland renloktsü atema shisaliok, electricity aser industry kanga tongtipang aser terenlok atema rongsen lemsatsü,a ta Acharya-isa shisem.
Iba sentong nung mendenji IIMUN Secretary General, Harsham Jain liasü, IIMUN Vice President, Priyank Vasani aser G. Rio Higher Secondary School Principal, Kevino Savino nati o jembi aser G. Rio HSS kaketshirtemi ken ka aten.