Angh Acharya-i ICFAI Convocation 2016 nung aden

November 23, 2016 nü Sovima, Dimapur nung Institute of Chartered Financial Analysts of India 2016 Convocation nung Nagaland Angh, P.B.Acharya-i jembiba noksa nung angur. 

Dimapur, Nov. 23 (TYO) : November 23, 2016 nü Nagaland Angh, P.B. Acharya-i Institute of Chartered Financial Analysts of India (ICFAI) indang Convocation 2016 sentong nung tongti tesemdanger ama shilem agi.
Iba sentong nung tetushi süa jaokerji Higher & Technical Education Parliamentary Secretary, Deo Nukhu liasü.
ICFAI University Nagaland ajanga Management & Information Technology degree programme agütsür, Library & Information Science nung BA Honours tenzükogo, Computer Hardware & Networking nung Certificated course agütsür aser ano professional programmes talila benoktsü mapa inyakdar, ta P.B. Acharya-i tanü o jembidang ashi.
University nung graduates aser post graduates nem tenüngsang agüja jembidang, pai ashiba agi, shisaliok reju ka nung kaketshirtemji tongtipangtiba lir aser reju tenüng tajung-tamajungji kaketshirtemi dang yanglur, ta ashi.
“Nenok koleni odir oaka aser kechi inyakdir inyakaka, nenoki nenok azüngdak aser linük nüma tangtettsüsa mapa inyaktsüla” ta Angh-isa kaketshirtem ayongzük.
Paisa, skill development dak temulung agütsütsü atema tayongzükba agütsüdang, kaketshirtemi University toktsüba sülen mapa agütsürtem masü saka mapa bushirtem ang akümer, ta ashi.
Naga nunger dak alaka bendanger shingaia Nagaland nung terenlok aser yimjung bener arutsütsü makok, anungji Nagaland nung aliba ali rongsen aser education system tsüngda tesentaktep yanglua mapa inyaktsüla, ta Acharya-isa shisem.
Sentong nung Deo Nukhu-ia o jembidang, degree ka angubaji teperi masü saka asüng nenoki degree anguba indang kuliji mapa agi sayutsüla, ta kaketshirtem ayongzük.
Nagaland nung Central University ka dang lir anungji ano tanga nija university tem nüngdaker, ta paisa ashi.
ICFAI University Nagaland ya North East nung dang masü linük ajunga nung reju tajungtiba rongnung ka akümtsü imlar, ta Deo Nukhu-isa metetdaktsü.