Angh Acharya-i ketdangsüa Puroik pur aini anir aoer

Dimapur, June 3 (TYO): Nagaland aser Arunachal Pradesh Angh, P.B. Acharya ketdangsüba nung Indian National Fellowship Centre, Mumbai-i Arunachal kübok Puroik kin nungi nisung 22 atema Educational, Emotional cum National Integration Home Stay teyari agütsür.
June 4, 2017 nungi tenzüka parnok Mumbai-Goa mesüra Mumbai-Pune nung amungtsü. Iba telok ya Bomdila Forest Rage Officer, Kashok Sullung lenisüba kübok lir aser kaketshir 15 dena lir, ta tanü PRO to Governor sangdong ka nung metetdaktsü.
June 3, 2017 nü Raj Bhavan, Itanagar nung aliba Governor’s Secretariat ketdangsertemi parnok apusoa yokba sentong ka agi. Iba mapang Arunachal Pradesh Deputy Secretary M. Damin, aser Under Secretary B. Megu nati teshimtet telok ka state maitsü tajungtiba nung sayutsü atema atyongzükba agütsü.
Angh Acharya tang New Delhi nung oa lir aser paia teshimtet telok den salem lemsatep aser iba mapa ajanga North East tesem aser linük nung tanüngba tesemtem tajungba nung sendakteptsü, ta ashi.
June 7 nungi 15, 2017 tashi parnoki Upanagar Shikshan Mandal (Vidyanidhi Infotech Academy), Excel Industries and Bakery, Juhu Chowpaty & beach, Veer Savarkar Memorial, Mayor Bunglow, Sanjay Gandhi National Park, Mt. Mary Church, Aarey Milk Colony aser ISKCON temple semdangtsü aser ano Bombay Darshan tour anir aotsü, ta INFC züngsem Pooja Kamath-i ashi.
Parnokisa Jawahar/Pada, community reliant village, SNDT Campus, Ruparel College semdangtsü aser Arunachal Students Union Mumbai dena ajuruteptsü, ta laisa ashi.
Parnoki Vidyanidhi Infortech Academy nung personality development & soft skills indang workshop ka nung adentsü aser tatembang anogo nung Maharashta sobaliba telok ka den sentong agitsü, ta Kamath-isa shisem.
Iba sentong nung Dr. Hanmanthrao Palep, Indian National Fellowship Centre, Working President, Mr. Dilip Paranjape, Indian National Fellowship Centre, Trustee General Secretary, Mr. Suresh Sathe, Indian National Fellowship Centre, General Secretary, Working Committee, Savitha Thakur, Uday Karandikar, Arun Deo aser Miss Kamath nungertem teyari agütsür.